Elmıra Bıtanova: Vaktsınalaýǵa qarsy adamdardyń kópshiligi ǵylym men medıtsınadan habary joq
ALMATY. QazAqparat – Vaktsınalaýǵa qarsy adamdardyń ǵylym men medıtsınaǵa esh qatysy joq. Mundaı pikirdi S. Asfendııarov atyndaǵy QazUMÝ jalpy ımmýnologııa kafedrasynyń meńgerýshisi Elmıra Bıtanova onlaın brıfıng barysynda aıtty, dep habarlaıdy QazAqparat tilshisi.
Immýnologtyń aıtýynsha, mindetti ekpelerdiń qazaqstandyq kúntizbesi álemdegi úzdikteriniń biri. Muny álemdik ǵalymdar qaýymdastyǵy atap ótken.
Bizdiń elimizdegi barlyq mindetti ekpeler (memlekettik emhanada nemese jeke emhanada) bıýdjet qarajaty esebinen tegin jasalady. Olardyń tizimi QR Úkimetiniń qaýlysymen bekitilgen.
«Bizdiń kúntizbe búkil álemniń ozyq tájirıbesin qamtıdy. Memleket vaktsınaǵa kóp aqsha jumsaýda. Jasalýy kerek vaktsınalardyń tolyq tizimi bar. Olardyń ishinde tumaý, jelsheshek, kene entsefalıti, qyzylshaǵa qarsy ekpeler bar. Sondaı-aq, ońtústik - shyǵys Azııa elderine, Afrıka jáne Arab elderine barýdy josparlap otyrǵandarǵa jáne epıdjaǵdaıǵa qaraı egiletin ekpeler bar», - dedi Elmıra Bıtanova.
Sonymen qatar, ol almatylyqtardy óz aǵzasyndaǵy antıdeneler sanyn qadaǵalamaýǵa shaqyrdy.
«Sebebi bul halyqqa jalǵan qorytyndy berýi múmkin. Antıdeneleri bolǵan kezde adamdar «bosańsyp», epıdemıologııalyq jáne gıgıenalyq normalardy saqtaýdy qoıady»,- deıdi ol.
Ǵalymdar vaktsınalaýdan keıin ımmýnıtet 2-3 jyl saqtalady degen boljam jasap otyr. Vaktsına baqylaý ústinde.
« N.F.Gamaleıa atyndaǵy epıdemıologııa jáne mıkrobıologııa ulttyq zertteý ortalyǵy qyzmetkerleri ózderi ázirlep jatqan vaktsınany osydan bir jarym jyl buryn synaqtan ótkizý úshin ózderine saldyrǵan. Antıdeneler mólsheri olarda osy kúnge deıin saqtalǵan. Onyń ústine, bul jaı ǵana dáleldengen antıdeneler emes, bular protektıvti, vırýs beıtaraptandyrady»,-deıdi spıker.
Osyǵan baılanysty Almaty ımmýnology halyqqa júginip, vaktsınatsııa alýǵa, sondaı-aq, ne ǵylymǵa, ne medıtsınaǵa esh qatysy joq vaktsınatsııaǵa qarsy adamdardy tyńdamaýǵa shaqyrdy.
Aıta keteıik, Almatyda 203 pýnkt, al olarda 1 809 medıtsına qyzmetkerinen turatyn 406 egý brıgadasy jumys isteıdi. Qala boıynsha 1 aqpan men 18 sáýir aralyǵynda barlyǵy 134 484 adam ekpe saldyrdy.
