El mereıin eselegen toı
ASTANA. QazAqparat - Búgin Mańǵystaý aýdanynyń ortalyǵy Shetpe selosynda ulan asyr toı. El Táýelsizdiginiń 25 jyldyǵymen tuspa tus kelip otyrǵan Shetpe selosynyń aýdan ortalyǵy bolǵanyna jarty ǵasyr ýaqyt bolypty. Elim degen azamattarynyń eren eńbekteriniń arqasynda kórkeıgen Shetpe selosynyń kórki kóz qaryqtyrar.
Dúbirli merekeniń basy ardagerler úıi janynan ashylǵan qosymsha qurylys - jattyǵý ortalyǵynyń ashylýymen bastaldy. Oblys ákiminiń orynbasary, oblystyq máslıhat depýttattary, aýdan aktıvi, oblystyq, aýdandyq ardagerler keńesiniń tóraǵalary bastaǵan bir top azamattar quttyqtaý sóz sóılep, qosymsha qurylystyń lentasyn qıdy. Budan soń kúrdeli jóndeýden ótip, jańasha jabdyqtalǵan «Qazpochta» AQ aýdandyq fılıaly ǵımaraty paıdalanýǵa berildi.
Sondaı-aq, ıgi isterdiń legi aýdanymyzdaǵy eki bilim oshaǵy men aýdandyq aýrýhanaǵa sý jańa tórt kóliktiń kilti tabystalyp, Shetpe selosynyń 50 jyldyǵyna oraı shyǵarylǵan eki birdeı kitaptyń tusaýkeseri jalǵasyn tapty. Óndiristik, qolóner, kásipkerlik aýylsharýashylyq ónimderinen quralǵan «Shetpe ónimderi» kórmesin tamashalaǵan kópshilik, «Shyraıly Shetpe» merekelik saltanatty jıynynda bas qosty. Shejireli ólkeniń damýyna úles qosqan azamattardy marapattaý merekelik asqa ulasty. Alǵash aýdan ortalyǵy bolǵan aýyldyń eńbekkerleri, aýdan aktıvi, ár túrli sala ardagerleri bas qosqan jıynda estelikterdiń aǵyny aǵytyldy. Ulan asyr toı alaman báıge, túrli sporttyq jarystarmen jalǵasýda. Tolyǵyraq «Jańa ómir» gazetiniń kelesi sanynan oqı alasyzdar.
Aıgúl RAHMETOVA
