«El merekesine - berekeli tartý» - respýblıkalyq basylymdarǵa sholý
***
«Egemen Qazaqstan» basylymynyń búgingi sanynda «El merekesine - berekeli tartý» atty maqala jarııalandy. Atalmysh maqalada Elbasynyń Aqmola oblysyndaǵy sapary jóninde baıandalady. Basylymnyń jazýynsha, astanalyq oblys Qazaqstan Táýelsizdiginiń 20 jyldyq mereıeli merekesine ómirimizdiń barlyq salasyndaǵy serpindi tabystarymen jaqyndap keledi. Memleket basshysynyń ekonomıkanyń 7 paıyzdyq ósimine qol jetkizý, el turǵyndarynyń emen-jarqyn tirshiligin qamtamasyz etý jónindegi tutqaly tapsyrmalaryn múltiksiz oryndaýdyń alǵysharttary qalyptasyp, súbeli jemisin bere bastady. Birinshi jartyjyldyqtaǵy údemeli ındýstrııalandyrý jobalarynyń aıaq alysyn saraptaǵan oblys basshylyǵy jyl sońyna deıin óńirlik jalpy ónim ósimin 622,5 mıllıard teńgege jetkizip, 8 paıyzdyq ósimdi eńserýdi dittep otyr.
Sondaı-aq atalmysh basylymnyń habarlaýynsha, tamyz aıy tamyljyp, dala jumystarynyń qarbalastyǵymen erekshelenýde. Dıqandar as atasy - nannyń moldyǵy úshin ter tógip, kóktemniń ár kúnin tıimdi paıdalandy. Nátıjesinde 391094 gektarǵa sebilgen dándi-daqyldyń qazirgi kezde 133243 gektaryna oraq túsken. Jáne 254707 tonna altyn dán bastyrylyp, qambaǵa quıyldy. Qazir bereke bastaýy sanalatyn jaýapty naýqan óńirdiń barlyq aýdandarynda qaýyrt júrgizilýde. Bul týraly «Egemen Qazaqstan» basylymynyń búgingi sanyndaǵy «Jıyn terin bastaldy» atty maqalada.
***
«Ońtústiktiń neke agenttikteri toqal taýyp berýmen aınalysady». Osyndaı taqyryppen «Aıqyn» basylymynyń búgingi sanyndamaqala jarııalandy.Basylymnyń jazýynsha, bıik minberlerden ekinshi áıel alýdy zańdastyrý máselesi qozǵalǵaly beri, «toqal» degen sózdi qulaǵymyz jıi shalatyn boldy. Tipti ońtústik astanamyzdyń neke agenttikteriniń biri «Toqal» qyzmetin usynyp otyr. Aty oǵashtaý estiletin bul qyzmet er adamdarǵa ekinshi áıel tańdaýǵa múmkindik beredi. Mundaı jańalyq er adamdardy ǵana emes, názik jandylardy da erekshe qýantsa kerek. Neke agenttikterine baryp, «Toqal» qyzmetine júgingen qyzdar da tabyla ketti dereý. Bilim izdep, mansap qýyp, ómirlik jaryn kezdestire almaǵan qyz balalardyń talaby bıik. Olar ortasha tabysty er adamǵa emes, qaltasy qalyń, jasy 40 pen 50-di eńsergen jigit aǵasyna ǵana ekinshi jar bolýǵa daıyn eken. Eń qyzyǵy, «Toqal» qyzmetine júgingen qyzdar «bolashaq jarynyń» báıbishesimen birge turýǵa da qarsy emes.
Sondaı-aq basylymnyń habarlaýynsha, «Dástúrli otbasy mádenıetin jańǵyrtý qajet». Osyndaı taqyryppen jarııalanǵan maqalaǵa Májilis depýtaty Kamal Burhanovtyń júrgizýimen «Qoǵam men otbasyndaǵy zorlyq-zombylyqty boldyrmaý saıasaty» taqyrybyndaǵy dóńgelek ústelde kóterilgen máseleler arqaý bolǵan. Depýtat Kamal Burhanovtyń aıtýynsha, halyq qalaýlylary bul máselemen ejelden tanys, ony talaı talqylap, tarazylapty da. Sonyń nátıjesi - 2009 jyly «Turmystyq zorlyq-zombylyqtyń aldyn alý týraly» zań qabyldanǵan. «Alaıda bul zańnyń qabyldanǵanyna, mine, 1,5 jyl ýaqyt bolsa da, bul zańnyń jumys jasap otyrǵanyn kóre almaı otyrmyz. Oǵan deıin jyl saıyn 500 áıel otbasyndaǵy zorlyq-zombylyqtyń qurbany bolatyn bolsa, búgin de dál sondaı kórsetkishke ıe bop otyrmyz»,- deıdi halyq qalaýlysy. Dóńgelek ústel otyrysynda kóterilgen osy jáne ózge de máseleler týraly «Aıqyn» basylymynyń búgingi sanynan bilýge bolady.
***
«Alash aınasy» basylymy búgingi sanynda «Kelimsekterdiń kesiri azaıar emes» atty maqala jarııalady. Basylymnyń jazýynsha, elimizdiń damý qarqyny údep, ekonomıkasy ilgeri basqan saıyn kórshi elderden nápaqa aıyrý úshin keletin mıgranttar legi kún sanap artyp keledi. Biri zańdy jolmen kelse, endi biri zańdy aınalyp ótedi. Al sońǵylarynyń naqty sanyn eshkim de dóp basyp aıta almaıdy. Mıgranttar qarasy kóbeıýmen qatar, olar tarapynan týyndaıtyn máseleler de artýda. Olar tek qana elimizdiń eńbek zańyn buzyp qana qoımaı, qylmystyq áreketterge de jıi barady. «Qazaqstan Respýblıkasy Bas prokýratýrasynyń baspasóz qyzmetiniń derekterine súıensek, aǵymdaǵy jyldyń bes aıynda sheteldikter tarapynan 726 qylmystyq, 60 myńdaı ákimshilik quqyqbuzýshylyq jasalǵan. 2009 jyldan beri túrli qylmystar jasaǵandary úshin 338 sheteldik ekstradıtsııalanǵan.
Sondaı-aq atalmysh basylymnyń betinde «Qyzyljardyń demografııasy dimkás kúıde» atty maqala jaryq kórdi. Sońǵy 12 jylda Soltústik Qazaqstan oblysynyń turǵyndary 125 myń adamǵa azaıǵan. Búginde árbir sharshy shaqyrym jerge alty kisiden ǵana keledi eken. Bul kórsetkish jyldan-jylǵa qarqynmen kemý ústinde. Statıstıka departamentiniń málimetinshe, ortasha eseppen oblystan bir jylda 4-5 myńdaı adam ózge memleketterge qonys aýdarýda. Kóshtiń basy Reseı jaqqa baǵyt alǵan. Bul másele jóninde tereńirek bilgińiz kelse, «Alash aınasy» basylymynyń búgingi sanyn qarańyz.
***
«Kazahstanskaıa pravda» basylymynyń jazýynsha, el egemendiginiń 20 jyldyǵyna arnalǵan temir jol arqyly uıymdastyrylǵan saıahat aıasynda Astanadan 10 tamyzda «Meniń Qazaqstanym» atty poıyz jolǵa shyǵady. Poıyzdyń jolaýshylary negizinen «Nur Otan» partııasynyń músheleri men áleýmettik qyzmet, densaýlyq saqtaý men qarjy, quqy qorǵaý salasynyń ókilderi bolyp otyr. Sondaı-aq onda mádenıet salasy men sport juldyzdary da bar. On kúni ishinde olar elimizdiń qalalary men aýyldarynda bolyp, temir jol stansalaryn aralaıdy. Ondaǵy maqsat respýblıka halqyn táýelsizdigimizdiń 20 jyldyǵyn erekshe saltanatpen atap ótýge shaqyrý.
