El mektepterinde sońǵy qońyraý 25 mamyrda soǵylatyn boldy
ASTANA. KAZINFORM — Buǵan deıin elimizdegi sý tasqynyna baılanysty sońǵy qońyraý saltanaty ótkizilmeıtini aıtylǵan-dy. Bul aqparat qoǵamda biraz talqyǵa túsip, kópshiligi qarsylyq tanytty. Búgin QR Oqý-aǵartý mınıstrliginiń apparattyq otyrysynda mınıstr Ǵanı Beısembaev elimizdegi 186 myń mektep bitirýshi úshin oqý jylynyń aıaqtalýyna arnalǵan sońǵy qońyraý sharasyn 25 mamyrda ótkizýdi tapsyrdy.
«Bıylǵy oqý jyly 25 mamyrda aıaqtalatynyn qatań eskertemin. Osyǵan oraı oqý baǵdarlamasyn jyl boıyna tabysty meńgergen 3,8 mıllıonnan astam oqýshy kelesi synyptarǵa kóshirilsin. Mekteptiń 1-10 synyp oqýshylaryna «Bilimim Otanyma» taqyrybyndaǵy biryńǵaı synyp saǵatyn ótkizý 24 mamyr juma kúnine josparlansyn. Bul byltyrǵy jyldyń qyrkúıek aıynda engizilgen «Birtutas tárbıe baǵdarlamasy» sheńberinde qabyldanǵan josparǵa sáıkes uıymdastyrylýy tıis. Áriptesterimizdiń usynysy boıynsha elimizde mamyr aıynda «Yntymaq aıy» aılyǵyn ótkizý josparlanǵan. Onyń aıasynda «Taza Qazaqstan», «Igi ister», «Kanıkýlda kitap oqıyq» jáne basqa sharalar qarastyrylǵan. Sonymen qatar, elimizdegi 186 myń mektep bitirýshi úshin oqý jylynyń aıaqtalýyna arnalǵan sońǵy qońyraý sharasyn 25 mamyrda ótkizýdi tapsyramyn», — dedi mınıstr.
Jıyn barysynda Ǵanı Beısembaev tótenshe jaǵdaı kezinde evakýatsııalyq pýnkte balalar men turǵyndarǵa psıhologııalyq kómek kórsetken 400 den astam mektep psıhology, óz mindetin atqara júrip, kelgen qıyndyqty elmen birge eńserýge qatysqan 29 myńnan astam pedagog pen bilim salasy qyzmetkerleriniń ólsheýsiz eńbegin erekshe atap ótti.
