El mektepterinde oryn tapshylyǵy qalaı sheshilip jatyr
ALMATY. KAZINFORM — 2024 jyly elimizde 373 myń oqýshy ornyna arnalǵan 257 mektep salyndy. Bıyl 300 myń oryndyqqa arnalǵan 200-ge jýyq mekteptiń qurylysy júredi.

— Memleket basshysy bastamashylyq etken «Jaıly mektep» ulttyq jobasy aıasynda oqý jylynyń basynan 254 myń oqýshy ornyna arnalǵan 105 mektep paıdalanýǵa berildi, onyń 40%-dan astamy aýyldyq jerlerde ornalasqan. Bilim berý ınfraqurylymyn qoldaý qory arqyly 27 myń oqýshy ornyna arnalǵan 25 mektep ashyldy. Bıyl qosymsha bes mektep pen 3,3 myń oryndyq ınternat qurylysy júrip jatyr, — dep jaýap berdi Bul týraly Oqý-aǵartý mınıstrligi Kazinform agenttiginiń joldaǵan saýalyna.
Mınıstrlikten atap ótkendeı, bilim berý nysandary qurylysynyń basym bóligi Jetisý, Qyzylorda, Batys Qazaqstan, Aqmola oblystarynda jáne Almaty qalasynda júrip jatyr.

Bul jobalardy iske asyrý oqýshy oryndarynyń tapshylyǵyn qysqartýǵa, sondaı-aq apatty ǵımarat máselesin sheshýge múmkindik beredi.
— Barlyǵy jemqorlardan tárkilengen qarajat esebinen jalpy sany 100 myń oqýshy oryndyq 89 mekteptiń qurylysy qarjylandyryldy. Osy jyly elimizde 300 myń oryndyq 200-ge jýyq mekteptiń qurylysy júredi. Bul sharalar 2026 jylǵa deıin oqýshy ornynyń tapshylyǵyn tolyqtaı joıýǵa múmkindik beredi, — dep habarlady mınıstrlikten.
Osyǵan deıin Memleket basshysynyń tapsyrmasymen Almatyda alǵashqy ulttyq mekteptiń qurylysy bastalǵanyn jazǵanbyz.