El mektepterinde 5000-nan astam muǵalim jetispeıdi
ALMATY. KAZINFORM — Qazaqstan mektepterinde 2026–2027 oqý jylyna pedagogterdi jumysqa qabyldaý jalǵasyp jatyr. Oqý-aǵartý mınıstrliginiń Kazinform saýalyna bergen jaýaby boıynsha qazir elimizdiń memlekettik mektepterinde 5 myńnan astam pedagogke arnalǵan bos jumys orny bar.
Qaı óńirlerde vakansııa kóp?
Mınıstrliktiń málimetinshe, sońǵy úsh jylda muǵalim tapshylyǵy shamamen eki esege azaıǵan. Degenmen jańa oqý jyly bastalǵan tusta mektepterde áli de myńdaǵan bos oryn bar.
Memlekettik mektepterde jalpy 5 357 laýazym bos. Onyń 51,9%-y qalalarda, al 2 575-i nemese 48,1%-y aýyldyq jerlerde ornalasqan.
Pedagogterge suranys eń joǵary óńirler qatarynda Almaty oblysy — 516, Qaraǵandy oblysy — 516 jáne Almaty qalasy — 421 vakansııamen tur.
Pánder boıynsha matematıka, bastaýysh synyp, orys tili men ádebıeti, fızıka jáne hımııa muǵalimderine suranys joǵary.
— Qazir 2026–2027 oqý jylyna bilim berý uıymdaryna pedagogterdi jasaqtaý jumysy jalǵasyp jatyr. Bos laýazymdarǵa úshin konkýrstar ótkizilip jatyr, — dep habarlady mınıstrlik.
Muǵalimderdiń jalaqysy eki esege ósti
Pedagogterdiń sanyn kóbeıtip, jas mamandardy tartý úshin sońǵy jyldary olardyń eńbekaqysy da aıtarlyqtaı ósti.
Mınıstrliktiń málimetinshe, sońǵy bes jylda pedagogterdiń jalaqysy 100%-ǵa, ıaǵnı eki esege artqan. Qazir 500 myńnan astam pedagogke biliktilik sanaty, eńbek ótili jáne ǵylymı dárejesi úshin turaqty qosymsha aqy tólenedi.
2023 jyldan bastap halyqaralyq olımpıadalar, konkýrstar men sporttyq jarystarda jeńimpaz jáne júldeger atanǵan oqýshylardy daıyndaǵan muǵalimderge úsh jalaqyǵa teń birjolǵy syıaqy beriledi.
Sondaı-aq 103 muǵalim «Qazaqstannyń eńbek sińirgen ustazy» qurmetti ataǵyna ıe boldy. 800-den astam pedagog «Úzdik pedagog» baıqaýynyń jeńimpazy atandy. Bul ataqqa ıe bolǵandarǵa 1000 AEK kóleminde aqshalaı syıaqy tólenedi.
2023–2026 jyldary «Bilim berýdegi 1000 ózgeris kóshbasshysy» jobasy aıasynda 983 pedagog kadrlyq rezervke engizildi. Al bes muǵalimge eldiń eń joǵary memlekettik nagradasy — «Qazaqstannyń Eńbek Eri» ataǵy berildi.
— Sonymen qatar pedagogterdiń kásibı biliktiligin arttyrý jumystary da jalǵasyp jatyr. Osy maqsatta 91 myńnan astam muǵalim biliktilikti arttyrý kýrstarynan ótti, — delingen mınıstrliktiń málimdemesinde.
Jas mamandarǵa basymdyq berilip jatyr
Jas mamandardy jumysqa ornalastyrýǵa da erekshe kóńil bólinip otyr. 2026 jyly memlekettik mektepterge 5 741 jas mamandy jumysqa ornalastyrý josparlanǵan. Bul — memlekettik mektepterge qabyldanatyn jalpy muǵalim sanynyń 50,2%-na teń.
Muǵalimderdiń bos oryndary men jumyspen qamtylýy Ulttyq bilim berý derekqorynyń «Muǵalimderdi jumysqa alý» modýli arqyly kún saıyn baqylanady.
Joǵary oqý ornyn úzdik bitirgen túlekter úshin jumysqa ornalasý tártibi de jeńildetilgen.
— Memlekettik bilim berý tapsyrysy boıynsha joǵary nemese joǵary oqý ornynan keıingi bilim alǵan, GPA kórsetkishi 3,33-ten tómen emes jáne sertıfıkattaýdan ótkenin rastaıtyn qujaty bar túlekterdi jumysqa konkýrssyz qabyldaýǵa múmkindik berilgen, — dep habarlady vedomostvo.
Sonymen qatar aýyldyq jerlerge jumysqa baratyndar úshin «Dıplommen aýylǵa» baǵdarlamasy bar. Onyń aıasynda kóshý úshin járdemaqy jáne turǵyn úı satyp nesıe beriledi.
Sonymen birge pedagogterdi daıarlaý úshin nysanaly memlekettik bilim berý tapsyrysy da júzege asyrylyp jatyr. Óńirler joǵary oqý oryndarymen jáne tehnıkalyq ári kásiptik bilim berý uıymdarymen túlekterdi jumysqa ornalastyrý boıynsha birlesip jumys isteıdi.
Mınıstrliktiń málimetinshe, qabyldanǵan sharalardyń nátıjesinde 2023–2025 jyldary pedagog kadrlarǵa degen qajettilik 45,8%-ǵa qysqarǵan.
Eske salsaq, Qasym-Jomart Toqaev bir top muǵalimdi memlekettik nagradamen marapattaǵan edi.
