El mektepterine engizilýi múmkin ekologııa baǵytyndaǵy oqýlyq ázirlenip jatyr
Jıynǵa ekologtar, qalanyń belsendi azamattary, sondaı-aq qoǵamdyq ekologııalyq uıymdar men jalpy bilim berý mekemeleriniń ókilderi qatysty.
Konferetsııada sóz alǵan Qazaqstan ekologııalyq qorynyń prezıdenti Aıgúl Ábdýalıeva joba sheńberinde atqarylyp jatqan jumystardyń barysyna toqtaldy.
«Ózderińiz biletindeı, búginde jahandyq jylyný protsesi qarqyn alyp barady. Sonymen qatar, plastık zattardy qoldaný kórsetkishi ulǵaıdy. Biz ózimiz turyp jatqan planetamyzdy qoqysqa aınaldyryp jatyrmyz. Sondyqtan biz munymen kúresýimiz kerek. Ol úshin ózimizden jáne jas urpaqtan bastaýymyz qajet. Olardyń sanasynda ekologııalyq mádenıetti qalyptastyrý mańyzdy», - dedi Aıgúl Ábdýalıeva.
Onyń aıtýynsha, qor janynan ekologııalyq klýb ashylǵan. Onda balalar men jasóspirimder eko-mádenıettiń alǵysharttarymen tanysyp, qoqysty bólip jınaý sııaqty daǵdylarǵa úırenedi. Sonymen qatar búginde mamandar mektep oqýshylaryna arnap ekologııa boıynsha oqýlyq jazyp jatyr.
«Qazir mektepterde ekologııa boıynsha fakýltatıv júrgiziledi. Bul rette biz bilim ordalarynda balalar sapaly bilim alýy úshin oqý materıaldaryn ázirleımiz. Sondaı-aq men ǵylym doktorlaryna ekologııa boıynsha oqýlyq jazýdy usyndym. Qazir olar kitap ázirlep jatyr. Biz ony pılottyq negizde Mańǵystaý oblysyndaǵy barlyq mektepterge engizemiz», - dep josparlarymen bólisti Aıgúl Ábdýalıeva.
Aıta keteıik, «Ekologııalyq mádenıetti arttyrý jáne jastar men balalarǵa qolaıly eko-jaǵdaılar jasaý jónindegi keshendi sharalar» jobasy Aqparat jáne qoǵamdyq damý mınıstrliginiń qoldaýy jáne «Azamattyq bastamalardy qoldaý ortalyǵy» usynǵan memlekettik granty aıasynda iske asyrylyp jatyr.
