El quramasynyń qorjynynda ázirge 25 joldama bar - Elsııar Qanaǵatov
ASTANA. KAZINFORM – Búgin Astana qalasynda Memleket basshysynyń tapsyrmasy boıynsha qurylǵan Olımpııa oıyndaryna daıyndyq shtaby kezekti otyrysyn ótkizip, 2024 jyly Parıjde ótetin oıyndarǵa daıyndyq barysyn talqylap, mınıstrlikke qarasty mekelemelermen keńeıtilgen jıynyn ótkizdi.
Atalǵan jıynǵa Qazaqstan Respýblıkasynyń Týrızm jáne sport mınıstriniń orynbasary Serik Jaraspaev, Sport jáne dene shynyqtyrý isteri komıtetiniń tóraǵasy Erbol Myrzabosynov jáne atalǵan shtabtyń basshysy Elsııar Qanaǵatov qatysty.
Jıyn barysynda birqatar másele talqyǵa tústi. Atap aıtsaq, Parıj Olımpıadasyna joldamalar sanyn barynsha ulǵaıtý, joldama alǵan sportshylardyń tórt jyldyqtyń basty dodasyna daıyndalýyna erekshe jaǵdaı jasaý, sporttyq medıtsına, ulttyq quramanyń sporttyq formalaryn daıyndaý barysy talqylandy.
Óz kezeginde atalǵan shtab basshysy Elsııar Qanaǵatov sońǵy kúnderi joldamaǵa talasqan sportshylarymyzdyń joǵary kórsetkishke qol jetkizgenin basa aıtty.
«Bokstan Italııada ótken lıtsenzııalyq týrnırde qazaqstandyq bylǵary qolǵap sheberleri óte joǵary kórsetkishke qol jetkizdi. Biz 3-4 joldama alamyz dep josparlaǵan edik. Ózderińiz kórgendeı, 6 boksshy baryp, 5 joldamaǵa qol jetkizdi. Bul - úlken kórsetkish. Mine, búgin qytaıdyń Taıan qalasynda taekvondodan ótip jatqan lıtsenzııalyq týrnırde taǵy bir otandasymyz Batyrhan Tóleýǵalı Parıj Olımpıadasyna joldama jeńip aldy. Joldamalar sany bunymen toqtamaıdy», - dep atap ótti Elsııar Qanaǵatov.
Sonymen qatar óz kezeginde Týrızm jáne sport mınıstriniń orynbasary Serik Jaraspaev Olımpıada oıyndarynyń bastalýyna 134 kún ǵana qalǵanyn aıta kele elimizdiń barlyq óńirinde sáýir aıynda sportshylarymyzdy qoldaý maqsatynda «Olımpıadaǵa 100 kún» aıasynda buqaralyq sporttan jarys, ár túrli is-sharalar uıymdastyrylatyny týraly atap ótti.
«Qazaqstan quramasynyń qorjynynda ázirge Parıj Olımpıadasyna 25 joldama bar. Sportshylarymyz jalpy 90-ǵa jýyq joldamaǵa ıelik etedi dep josparlap otyrmyz. Barlyǵyn ýaqyt kórsetedi. Sondaı-aq júldege úmitker 54 sportshydan turatyn tizim jasaqtaldy. Qurama kóshbasshylary ár sport túriniń ereksheligin eskere otyryp, arnaıy josparmen daıyndalady. Olımpıada aldyndaǵy testilik jarystarǵa qatysý da mańyzdy ekeni tilge tıek etildi. Ár sport túriniń jarys kestesine sáıkes, komandalardyń Parıjge ushyp barý ýaqyty bekitiletin boldy», - dedi Serik Jaraspaev.
Aıta keteıik, tórtjyldyqtyń basty dodasy 26 shilde men 11 tamyz aralyǵynda Frantsııa astanasy Parıjde ótedi. Oǵan álemniń 205 elinen 10 myńnan astam sportshy qatysyp, 32 sport túrinen 329 medal jıyntyǵy sarapqa salynady.
