El quramasy semserlesýden Shveıtsarııada ótken álem kýbogynyń kezeńinde úzdik ondyqqa endi

ASTANA. KAZINFORM – Qazaqstannyń erler quramasy semserlesýden Bernde (Shveıtsarııa) ótken álem kýbogynyń kezeńinde shırek fınalǵa deıin jetti. 

Ulttyq olımpıadalyq komıtettiń málimetinshe, komandalyq jarysta medal úshin Elmır Álimjanov, Vadım Sharlaımov, Erlik Sertaı jáne Rýslan Qurbanov kúresti.

1/16 fınalda bizdiń semserlesýshiler Danııany 31:30 esebimen jeńdi. Kelesi kezeńde Qazaqstan quramasy Ýkraınany 33:32 esebimen tize búktirdi.

Shırek fınalda qazaqstandyq sportshylar Vengrııaǵa 36:45 esebimen ese jiberdi. Sodan soń 5-8 oryndar úshin ótken kezdesýde Qazaqstan Shveıtsarııadan 42:45 esebimen jeńildi. Jetinshi oryn úshin Nıderland quramasymen bolǵan saıysta qazaqstandyqtar 45:40 esebimen jeńiske jetti.

Osylaısha, Qazaqstan quramasy álem kýbogynyń kezeńinde jalpykomandalyq esep boıynsha 7-orynǵa ıe boldy.