El quramasy sapynda oınaý úshin tolyq daıyn bolý kerek — Dıas Dosqaraev

Qazaqstan tennıs federatsııasynyń vıtse-prezıdenti Dıas Dosqaraev Bıllı Djın Kıng kýboginiń fınaldyq kezeńinde óner kórsetken el quramasynyń oıynyn qorytyndylady, dep habarlaıdy Kazinform.

Áńgimesiniń álqıssasyn Dıas Dosqaraev Qazaqstan tennıs quramasynyń jaqsy oıynshylardan quralǵanynan bastady. Shyn máninde Bıllı Djın Kıng kýboginiń fınaldyq kezeńinde álemniń úzdik degen tennısshileri baq synaıdy. 

Ol sóz arasynda Qazaqstan quramasyna sáttilik jetispegninde aıtyp qaldy. Eń aldymen jaraqatyna baılanysty bul synda Elena Rybakına oınaı almaǵanyn tilge tıek etti. Sondaı-aq Qazaqstan tennıs federatsııasynyń vıtse-prezıdenti Lenanyń densaýlyǵy jaqsy, ózi babynda bolǵanda, álemniń kez kelgen tennısshisin jeńe alatynyn jasyrmady. 

«Elena Rybakınanyń Rolan Garros týrnırinen bastap jaraqatpen alysqanyn kórdik. Sonyń saldarynan Ýımbldonda ótken jylǵy ataǵyn qorǵaı almady. AQSh-taǵy jarystar oıdaǵydaı nátıje ákelmedi. Soǵan qaramastan, biz onyń daıyndyǵy úshin barlyq múmkin jaǵdaıdy jasadyq. Ókinishke qaraı korttyń sapasy nashar bolǵandyqtan, Meksıkanyń Kankýn qalasynda ótken WTA qorytyndy týrnırinde arqasynan jaraqat aldy. Lena Sevılıaǵa úlken úmitpen keldi. Daıyndaldy, biraq ony oıynǵa qosý úshin 100 paıyz ázir bolýy qajet edi. Álemdik reıtıngide qansha joǵary tursań da, tolyq daıyn bolmasań, oınaı almaısyń. Komandalar quramyna qarasaq, Iga Shventek, Djessıka Pegýla, Korı Gaýff, Karolına Mýhova sııaqty mańdaıaldy tennısshiler kelgen joq. Al Rybakına bizben birge bolyp qana qoımaı, qosalqy quramda kortqa shyqqan tennısshilerimizdi qoldap otyrdy», — dedi Dıas Dosqaraev. 

Onyń málimdeýinshe, Elena qashanda el quramasy úshin oınaýdy basty mindet dep esepteıdi. Buǵan ótken jyly Germanııamen ótken matchta eki mańyzdy upaıdy komandasyna alyp bergeni dálel. Sonyń arqasynda Qazaqstan álem chempıonatynyń fınaldyq kezeńine joldama aldy. Bıyl da Polshamen kezdesýde dál solaı boldy. 

Ekinshi jaǵynan, basqa tennısshilerdiń kortqa shyǵýyna múmkindik berildi. ıÝlııa Pýtıntseva birinshi raketka bolsa, Anna Danılına jekeleı synda óner kórsetti. Árıne, Rybakına jetispedi.
Sáttilik te qarsylastar jaǵynda boldy. Toptaǵy úsh komandanyń upaılary birdeı boldy. Tek qosymsha kórsetkishterdi eseptegende, jartylaı fınalǵa shyǵý úshin Qazaqstan quramasyna nebári eki set jetpeı qaldy. Sóıtip, topta Slovenııa jeńimpaz atansa, Qazaqstan ekinshi, álemniń jeti dúrkin chempıony, ótken jylǵy fınalıst Aýstralııa úshinshi orynda qaldy. Bul básekelestiktiń myqty ekendigin kórsetedi. Ótken jyly Glazgoda da set aıyrmashylyǵynan Qazaqstan jartylaı fınaldan tys qalǵan edi. 

«Álem chempıonaty Qazaqstan quramasy úshin oń ózgeristermen de erekshelendi. Sońǵy eki-úsh jylda álemdik reıtıngide joǵary kóterilip kele jatqan Jibek Qulambaeva alǵashqy jeńisine qol jetkizdi. Qazir Jibek juptyq synda álemdik reıtıngide 149-orynda. Slovenııamen matchta Anna Danılınamen birge oınaǵan Qulambaeva ózin jaqsy qyrynan kórsetti.

Jibek pen Anna — bizdiń bolashaǵymyz. Jibektiń Team Kazakhstan akademııasynyń túlegi ekendigi qýantady. Osy akademııadan túlep ushqan Arýjan Saǵyndyqova da quramada boldy. Bul onyń óz sheberligin odan ári jetildire túsýine serpin beredi», - dep túıindedi oıyn Dıas Dosqaraev.

Eske sala keteıik, budan buryn tennısten álem chempıonatynda Qazaqstan Slovenııany jeńgenimen, kelesi kezeńge óte almaǵanyn jazǵan bolatynbyz.

Sondaı-aq Jibek Qulambaeva Qazaqstan quramasy sapynda alǵashqy jeńiske qol jetkizgenine qýanyshty ekenin aıtty.