El qorjynyna Parıj olımpıadasynyń taǵy bir joldamasy tústi
ASTANA. KAZINFORM - Qytaıdyń Taıan qalasynda ótip jatqan lıtsenzııalyq týrnırde qazaqstandyq taekvondoshy Samırhon Ababakırov (58 kg) Parıj Olımpıadasynyń lıtsenzııasyna ıe boldy.
Sportty damytý dırektsııasynyń baspasóz qyzmeti málim etkendeı, jartylaı fınalda otandasymyz Fılıppın ókili Kýrt Brıan Barbosany jeńdi. Ulttyq qurama sportshysy eki raýndta da aıqyn basymdylyqqa ıe boldy. Esep: 2-0.
Ababakırov osyǵan deıin Nurhan Samıdınovty (Qyrǵyzstan), sosyn Tanakrıt Iodrakty (Taıland) utqan bolatyn.
Bul taekvondodan Ulttyq quramanyń Parıjdegi oıyndarǵa alǵan ekinshisi joldamasy. Keshe Batyrhan Tóleýǵalı (-80 kg) alǵash bolyp «arnaıy bıletke» qol jetkizgen.
Qytaıdaǵy jarysta Parıj Olımpıadasynyń joldamasyna ár salmaqta fınalǵa shyqqan eki sportshy ıe bolady. Barlyǵy týrnırde 33 memleketten kelgen tańdaýly 96 taekvondoshy kúsh synasyp jatyr.
