El Konstıtýtsııasy men jeke tabysy – qaraǵandylyqtar óz jetistikteri týraly aıtty

QARAǴANDY. QazAqparat - Qaraǵandylyqtar QR Konstıtýtsııasy kúnine arnalǵan onlaın kezdesýde konstıtýtsııalyq quqyqty iske asyrý jáne qoıylǵan maqsattarǵa qol jetkizý týraly óz jetistikterimen bólisti, dep habarlaıdy QazAqparat oblys ákimdigine silteme jasap.

«Táýelsiz Qazaqstan: Jasampazdyqqa toly jyldar. Karaǵandy oblysynnyń basty jetistikteri» taqyrybynda ótken dóńgelek ústelge saıasatkerler, qoǵamshyldar jáne túrli mamandyq ıeleri qatysty.

«Bıyl Konstıtýtsııa kúni Táýelsizdiktiń 30 jyldyǵynda ótýde. Biz elimizdiń negizgi Zańy ýaqyt synynan ótip, jalpyulttyq damýda óziniń negiz qalaýshy mańyzyn dáleldedi dep nyq senimmen aıta alamyz. Mysaly, oblystyń 498 mektebi bizdiń balalarymyzdyń tegin bilim alý konstıtýtsııalyq quqyǵyn iske asyrýǵa múmkindik beredi. Óńirdiń 150-den astam medıtsınalyq mekemeleri tegin medıtsınalyq kómek alý quqyǵymyzdy júzege asyrady. Oblysta 1000 úkimettik emes uıym, 6 partııa fılıaly, 65 kásiptik odaq jumys isteıdi, olar arqyly azamattardyń birlesý bostandyǵyna konstıtýtsııalyq quqyǵy iske asyrylady» , - dep atap ótti oblys ákimi Jeńis Qasymbek.

Óńir basshysy aýyl ákimderiniń alǵashqy tikeleı saılaýyn eske saldy. Bul qoǵamdy demokratııalandyrý jolyndaǵy taǵy bir qadam, dep atap ótti ol.

Osy saılaýdyń jeńimpazdarynyń biri, 27 jastaǵy Rasýl Qasenhan josparlarymen bólisti.

«Men Balqashta týyp óstim. Bala kezimnen bizdiń aımaqtyń qoǵamdyq ómirine belsendi qatysýǵa umtyldym. Gúlshat kentiniń ákimi bola otyryp, birinshi kezekte problemalardy zerttedim. Aýyl ómiri jaıly bolyp, jastar týǵan jerinde qalýy úshin men olardy sheshýge kúsh salamyn. Sebebi aýyldy damytý – elimizdiń órkendeýiniń kepili», - deıdi jas ákim.

«Qazaqstannyń 100 jańa esimi» jobasynyń jeńimpazy, kenshi Danıel Dıl qıyn eńbektiń sporttyq mansappen qalaı úılesetinin aıtyp berdi.

« Men shahtada jerasty taý-ken jumysshysy bolyp qyzmet etemin jáne bala kezimnen sportpen shuǵyldanamyn. Qazir men sporttyq akrobatıkadan halyqaralyq dárejedegi sport sheberimin. Jeńisterge tabandylyq pen eńbektiń arqasynda qol jetkizemiz, sonymen birge olar alǵa jyljýǵa yntalandyrady. Jattyǵýlarymdy jalǵastyramyn», - dep kenshi-sportshy halyqaralyq arenada elimizdiń dańqyn taǵy da asqaqtatýǵa ýáde berdi.

Dóńgelek ústelde akademık E.A. Bóketov atyndaǵy Qaraǵandy ýnıversıtetiniń rektory Nurlan Dýlatbekov, QR Parlamenti Májilisiniń depýtaty Berik Ábdiǵalıuly, Konstıtýtsııalyq keńestiń múshesi Únzıla Shapaq sóz sóıledi.