El kınoteatrlarynda «Aljır» fılmi kórsetiledi
ASTANA. QazAqparat - 7 mamyrdan bastap Astana, Almaty, Shymkent, Aqtóbe men Qaraǵandy kınoteatrlarynda "Aljır" fılminiń kórsetilimi bastalady, dep xabarlaıdy QazAqparat tilshisi.
"Qazaqstan" RTRK" AQ tapsyrysy boıynsha túsirilgen fılmde saıası qýǵyn-súrgin kezinde memlekettik satqyndardyń áıelderi otyratyn Aqmola lagerine qamalyp, "xalyq jaýy" atanǵan tutqyndardyń taǵdyry baıandalady. Bas keıipkerlerdiń biri - Sveta ájesiniń sońǵy ósıetin oryndaımyn dep, Astanaǵa jol tartady. Ájesiniń kúndeligin oqyp, lagerdiń barlyq azabyna qanyq bolǵan ol qazaq jaýyngeri Álıxan Seıdaxmetovti izdeýge bel býady. Sonaý surapyl jyldary dál sol jaýynger óz ómirin qaterge tigip, lagerde otyrǵan biraz áıelder men balalarǵa kómektesti. Sveta ony tabady. Qazirgi Álıxan - bir aýyldyń qurmetti aqsaqaly.
Fılm jappaı saıası repressııalardyń 80 jyldyǵyna arnalyp otyr. Rejısser - Ánýar Raıbaev. Basty rólderdi Qobylandy Bolat, Altynaı Nógerbek, Anna Starchenko jáne taǵy basqa akterlar somdaıdy.
Kartına «Kinopark» kınoteatrlar jelisinde kórsetiledi. Atap aıtqanda, Aqtóbede - Kinopark 7 «Keryencity», Shymkentte - Kinopark 5 «Mega Planet», Almatyda - «Spýtnık», «Saryarka», «Esentai Mall», Astanada - «Kerýen», «Mega sıtı» men «Saryarka», Qaraǵandy qalasynda - "City Mall".Kinoplexx.
