El kásipkerleriniń jumys kúshin ustaýǵa jumsaǵan shyǵyndary 18 %-ǵa ósip, 12 trıllıon teńgeden asty

NUR-SULTAN. QazAqparat - Qazaqstandyq kásipkerlerdiń jumys kúshin ustaýǵa jumsaǵan shyǵyndary bir jylda 18%-ǵa ósip, 12 trıllıon teńgeden asty. Onyń ishinde jalaqy qoryna 11 trıllıon teńgege jýyq qarjy tústi. 2021 jyly zańdy tulǵalardyń jumys kúshin ustaýǵa jumsalǵan shyǵyndarynyń kólemi 12,4 trln teńgeni qurady, bul 2020 jylmen salystyrǵanda birden 17,8%-ǵa artqanyn kórsetedi, dep habarlaıdy QazAqparat Finprom.kz-ke silteme jasap.

Jumys kúshin ustaýǵa jumsalatyn shyǵyndardyń 86,8%-y qyzmetkerlerdiń jalaqy qoryna tıesili, bul - 10,8 trln teńge, 2020 jylmen salystyrǵanda 18,7% - ǵa artyq. Onyń ishinde, jalaqynyń ózine tikeleı - 7,9 trln teńge, birjolǵy tólemder men syıaqylarǵa - 1,5 trln teńge, jumys istelmegen ýaqyt úshin aqy tóleýge - 870,7 mlrd teńge, jumys rejımi men eńbek jaǵdaılaryna baılanysty ótemaqy tólemderine 523,1 mlrd teńge tólengen.

Óz kezeginde, jalaqy qorynda eskerilmeıtin tólemder men shyǵystar 1,6 trln teńgeni quraǵan. Bul da bir jyl burynǵyǵa qaraǵanda 12,2%-ǵa artyq.

Joǵarydaǵy somanyń edáýir bóligi jumys kúshin paıdalanýǵa baılanysty salyqtarǵa (693,2 mlrd teńge) jáne qyzmetkerlerdi áleýmettik qorǵaýǵa arnalǵan shyǵystarǵa (663,3 mlrd teńge) tıesili.

Budan basqa, 2021 jyly qyzmetkerlerdi turǵyn úımen qamtamasyz etý boıynsha shyǵystarǵa - 79,6 mlrd teńge, qyzmetkerlerdi oqytýǵa - 32,6 mlrd teńge, mádenı is-sharalardy ótkizýge, demalys pen oıyn-saýyq uıymdastyrýǵa - 17,6 mlrd teńge jumsalǵan.