«El ishindegi qundylyq» degen jańa uǵym engiziledi – zań jobasy
«Ónerkásiptik saıasat týraly» negizgi zań jobasynyń 3-bólimi otandyq ónerkásiptik ónimdi ótkizý naryqtarynda ilgeriletýge járdemdesýdi qamtamasyz etýge baǵyttalǵan. Bul úshin, eń aldymen, sheteldegi mekemelerimizdiń, kásiporyndarymyzdyń qoldaýy arqyly eksportqa baǵdarlanǵan ónerkásiptik kásiporyndardy qoldaýǵa kóńil bólý usynylady. Bul rette qoldaý sharalary qosylǵan qunnyń jahandyq tizbegine enýi múmkin kásiporyndardy qurýǵa jáne olardyń qyzmetine baǵdarlanady», - dedi vıtse-mınıstr.
Onyń aıtýynsha, kórsetilgen jaıttarmen qatar, memleket syrtqy naryqtaǵy kedergilerdi joıý máselelerinde eksporttaýshylarǵa járdem kórsetýi tıis.
«Qazaqstannyń Dúnıejúzilik saýda uıymyna kirýine baılanysty bıyldan bastap jergilikti qamtý ınstıtýtynan bas tartýymyz kerek. Osyǵan baılanysty zań jobasynda «El ishindegi qundylyq» degen jańa uǵym engiziledi. Jobanyń birqatar normalary satyp alýlarda ulttyq standarttardy qoldanýdy monıtorıngteý arqyly ulttyq ekonomıkanyń ózindik jetkiliktiligin qamtamasyz etýge baǵyttalǵan. Sondaı-aq, jumys memlekettik satyp alýdaǵy ulttyq rejımnen alyp tastaýdy belgileý baǵyty boıynsha júrgiziledi. Bólimniń barlyq kórsetilgen baǵyttary Qazaqstan qabyldaǵan halyqaralyq mindettemelerdi eskere otyryp, iske asyrylatynyn atap ótken jón», - dedi Amanııaz Erjanov.
«Zań jobasyndaǵy tórtinshi bólim mynadaı baǵyttar boıynsha otandyq ónerkásiptiń básekege qabilettiligin arttyrý máselelerin retteýge baǵyttalǵan: eńbek ónimdiligin arttyrý, ınvestıtsııalar tartý, ındýstrııalandyrý kartasy, shıkizatty óńdeýdi tereńdetý», - dedi ol.
Budan buryn habarlanǵandaı, búgin Májiliste «Ónerkásiptik saıasat týraly» zań jobasy men oǵan ilespe qujat tanystyryldy.
Ónerkásiptik saıasatty tıisti úılestirýdi qamtamasyz etý úshin negizgi zań jobasynda Ónerkásiptik saıasat jónindegi vedomstvoaralyq komıssııa (VAK) qurylmaq.
