El ishinde demalý qansha turady
NUR-SULTAN. QazAqparat - «Kazakh Tourism» ulttyq kompanııasy» AQ basqarma tóraǵasy Órken Bısaqaev tabysy ortasha qazaqstandyqtar otandyq demalys oryndarynda qansha qarajat jumsaıtynyn aıtty, dep habarlaıdy QazAqparat.
«Baǵa maýsymǵa, demalatyn jerine, týrıstik usynys qurylymyna, tamaqtanýǵa (barlyǵy qamtylǵan, tek tańǵy as jáne taǵy basqasy) jáne basqa da kóptegen qosalqy faktorlarǵa baılanysty bolady. Mysaly, Şýche-Býrabaı kýrorttyq aımaǵynda úsh juldyzdy qonaqúıde tańǵy as qamtylǵan standartty nómirde jazǵy kezde demalý quny bir eresek adamǵa 10 myń teńgeden 30 myń teńge aralyǵynda bolady. Kóptegen otelder jeńildikter usynady, al 5 jasqa deıingi balalar tegin demala alady. Mysaly, Saryaǵash kýrorttyq aımaǵynda bes ret tamaqtanýmen jáne emdeý baǵdarlamasymen standartty nómirde turý baǵasy 11-15 myń teńge aralyǵynda. Kóptegen sanatorııler de balalarǵa jeńildikter usynady», - dedi rrimeminister.kz saıtyna suhbat bergen Ó.Bısaqaev.
Kompanııa basshysynyń dereginshe, Alakól jaǵalaýynda tolyq qyzmet kórsetiletin demalys bazalarynda bir nómirdiń quny 10-12 myń teńge aralyǵynda. Mudan eki ese arzan nemese úsh ese qymbat demalys oryndaryn da tabýǵa bolady. Bári týrıstiń qalaýyna baılanysty.
«Sonymen qatar, el ishinde demalý qunyn tómendetý maqsatynda týrızm boıynsha memlekettik baǵdarlamada qazaqstandyq kýrorttarda demalǵan jaǵdaıda «1+2» syzbasy boıynsha (bir ata-anaǵa eki bala) KIDS GO FREE qaǵıdatymen balalarǵa áýe bıletteriniń baǵasyn sýbsıdııalaý qarastyrylǵan. Bul shara 5 adamnan turatyn otbasy el ishinde demalysty tańdaǵanda otbasylyq bıýdjetten orta eseppen 100 myń teńgeni únemdeýge múmkindik jasaıdy», - dedi ol.
«Kazakh Tourism» basshysy sondaı-aq Túrkııanyń demalys oryndary men Býrabaıdyń baǵasyn salystyrýǵa bolmaıtynyn aıtty.
«Bul eki nysan ınfraqurylymnyń damý deńgeıimen ǵana emes, týrıstik usynystarmen, týrıstik maýsymnyń uzaqtyǵymen jáne basqa da jaǵdaılarmen erekshelenedi. Bul oraıda Býrabaıdy Antalııamen salystyrýǵa bolmaıdy. Bulardyń bir-birinen aıyrmashylyqtary bar. Tipti baǵasy birdeı bolǵannyń ózinde olar bir-biriniń ornyn almastyra almaıdy», - dedi basqarma tóraǵasy.
Kompanııa basshysynyń atap ótýinshe, Býrabaı - bul sanatorıılik emdi esepke almaǵanda birkúndik týrlar, demalys kúnderi, qysqa merzimdi demalys ótkiziletin jer.
«Tipti, bul jaǵdaıda da kez kelgen qarjyǵa demalatyn oryn: shatyrlar men jeke úılerden bastap, besjuldyzdy qonaqúıge deıin tabýǵa bolady. Servıs deńgeıine baılanysty máseleler bar. Biraq bul ýaqyt pen básekeniń jetkilikti bolýyn talap etetindikten, birtindep jónge keletin másele», - dedi Ó.Bısaqaev.
