El ishinde arzan bedel jınap júrgen alaıaqtar az emes –Qasym-Jomart Toqaev
«Árbir adam jaýapsyz qadamnyń arty búkil elge qasiret ákelýi múmkin ekenin tereń túsinýge tıis. Barlyq salada, barlyq deńgeıde jaýapkershilik bolsa ǵana, isimiz ońǵa basady. Shyn máninde, syn saǵatta kimniń kim ekeni anyq kórinedi. Elge jany ashıtyn adam qıyn jaǵdaıǵa tap bolǵan jurtqa naqty ispen kómektesýge daıyn bolady», - dedi Prezıdent.
Memleket basshysy ókinishke qaraı, qazir qoǵamdy ishinen iritetin jaǵymsyz dúnıeler kóbeıip bara jatqanyna alańdaýshylyq tanytty.
«Ózderin, tipti, Alpamys batyr sııaqty el qorǵany sanaıtyn qylmys áleminiń serkeleri, ıaǵnı krımınaldyq top basshylary bar. Kóptegen adamdar, ásirese, jastar solarǵa qatty elikteıtin boldy. El ishinde arzan bedel jınap júrgen alaıaqtar az emes. Olardyń bári – halyqtyń sanasyn ýlaıtyn sekta ókilderi. Bir qaraǵanda olar elge janashyr bolyp kórinedi. Al, túptep kelgende, psıhologııalyq aıla-tásildermen jurtty adastyrady. Qoǵamǵa jalǵan qundylyqtar taratyp, kópshilikti týra joldan taıdyrady. Munyń bárin ıdeologııalyq qoqys nemese múldem qajeti joq aqparat deýge bolady. Biz órkenıetti el retinde halqymyzdyń dúnıetanymyna jat nárselerge qarsy turýǵa tıispiz. Ol úshin, eń aldymen, oqý-aǵartý jumysyn kúsheıtýimiz kerek», - dedi Qasym-Jomart Toqaev.
