El ımıdji – Oljas Bektenov bıyl 53 vokzaldy qaıta jańǵyrtýdy tapsyrdy
ASTANA. KAZINFORM – Bıyl elimizdiń 53 temirjol vokzalyn rekonstrýktsııalaý josparlanyp otyr. Bul týraly Kólik mınıstri Marat Qarabaev Úkimet otyrysynda aıtty.

Mınıstrdiń aıtýynsha, qazir bul jobalardy qarajatpen qamtamasyz etý maqsatynda halyqaralyq qarjy ınstıtýttarymen kelissózder júrgizilip jatyr .
− Jalpy, temirjol salasyndaǵy jobalardy júzege asyrý 20 jyldaǵy áleýmettik-ekonomıkalyq baǵytta 11 trln teńge bolatyn mýltıplıkatıvti áserge qol jetkizýge múmkindik beredi. Sondaı-aq, 2025-2029 jyldary jalpy ishki ónimniń ósimine shamamen 0,4-ten 1% deńgeıinde úles qosýǵa yqpal etedi, − dedi Marat Qarabaev búgingi Úkimet otyrysynda.
Sonymen birge, mınıstr barlyq joba boıynsha bıylǵy sáýir aıynda qurylys-montajdaý jumystaryn bastaý josparlanǵanyn aıtty.
Premer-mınıstr Oljas Bektenov vokzaldardy jańǵyrtý máselesine erekshe toqtaldy.
− Vokzaldar boıynsha ózińizge tapsyrma bergen bolatynmyn. Bul óte mańyzdy, elimizdiń ımıdjine, bedeline óte áser etetin másele. Sondyqtan ony bıyl aıaqtaý qajet, tıisti qarjylandyrý qajet, — dedi Úkimet basshysy.
Aıta keteıik, bıyl Qazaqstannyń 5 myń shaqyrymǵa jýyq temirjoly jańǵyrtylady. Qyzyljar — Moıynty» jańa temirjol jelisi salynady, «Altynkól — Jetigen» jáne «Beıneý — Mańǵystaý» ýchaskeleri jańǵyrtylady.
Elimizde jalpy sany 59 vokzal bar. Olardyń basym bóligi «Qazaqstan temir jolynyń» balansynda, al Almaty-1, Almaty-2, Pavlodar, Ekibastuz, Aqsý, Túrkistan jáne Shymkent vokzaldary ákimdikterdiń qaramaǵynda.
Sondaı-aq, Qazaqstandaǵy joldar qurylysynda otandyq kompanııalarǵa artyqshylyq beriledi. Bıyl «Jezqazǵan-Qaraǵandy», «Aqtóbe-Ulǵaısyn», «Atyraý-Dossor» jańa joldarynyń qurylysy bastalady.