El halqynyń 23,2% salaýatty ómir saltyn ustanady - mınıstr

ASTANA. QazAqparat – Bıyl elimizde salaýatty ómir saltyn dáripteý baǵytynda 1,4 mıllıonnan astam is-shara ótkiziledi. Bul týraly Úkimet otyrysynda aıtyldy, dep habarlaıdy QazAqparat tilshisi.

«Salaýatty ómir salty qyzmetin respýblıkalyq deńgeıde ulttyq qoǵamdyq densaýlyq saqtaý ortalyǵy usynady. Óńirlik deńgeıde onyń fýnktsııasy básekelestik ortaǵa berildi. Ótken jyldyń qorytyndysy boıynsha salaýatty ómir saltyn ustanatyn qazaqstandyqtardyń úlesi 23,2% qurady. Pandemııa kezinde salaýatty ómir saltyna baǵyttalǵan bıýdjet qarjysy 4 esege qysqardy. Al búginde 512 mln teńgeni quraıdy», - dedi Densaýlyq saqtaý mınıstri Ajar Ǵınııat Úkimet otyrysynda.

Mınıstrdiń aıtýynsha, pandemııa kezinde salaýatty ómir saltyna baǵyttalǵan is-sharalar 10 ese azaıyp, halyqtyń odan habardar bolýy 2019 jylǵy 67%-dan, byltyr 12%-ǵa deıin tómendegen.

«Halyqty salaýatty ómir saltynyń daǵdylary týraly kóbirek habardar etý jáne ınfektsııalyq emes aýrýlardyń aldyn alý maqsatynda «Deni saý ult» ulttyq jobasy iske asyrylýda. Onda salaýatty ómir saltyn ustanatyn halyq úlesin ulǵaıtý, buqaralyq sportty damytý sharalary qarastyrylǵan. Sonymen qatar ulttyq jobada shylym tartý, alkogol tutyný jáne semizdikpen kúreske arnalǵan jeke baǵyttar bar», - deıdi vedomstvo basshysy.

Sondaı-aq A. Ǵınııat bıyl elimizde salaýatty ómir saltyn dáripteý baǵytynda 1,4 mıllıonnan astam is-shara ótetinin málim etti.