El halqyn otandyq azyq-túlikpen qamtýǵa tolyq múmkindik bar - Erbol Qarashókeev
«Aýyl sharýashylyǵy mınıstrliginiń aldyna qoıylǵan mindettiń biri – halyqty Qazaqstanda óndirilgen azyq-túlik taýarlarymen, eń aldymen qus eti, balyq, shujyq, súzbe men irimshik, alma jáne qantpen qamtý. Ol úshin taıaýda qabyldanǵan Ulttyq jobalar aıasynda 930-dan astam ınvestıtsııalyq jobany 2025 jyldyń sońyna deıin júzege asyrý kózdelgen. Onda 150-den astam taýarlyq sút fermasyn paıdalanýǵa berý qarastyrylǵan. 19 úlken qus fabrıkasy salynady. Onyń ishinde 9 et óńdeıtin zaýyt bolady. 6,6 myń gektar qarqyndy baqty paıdalanýǵa berý de josparlanǵan» - dedi mınıstr Senat depýtattarynyń saýalyna oraı.
Onyń atap ótýinshe, atalǵan jobalardy júzege asyrýǵa 4,5 trln teńge qarajat tartylady.
«Al qarastyrylyp otyrǵan 2022-2024 jyldarǵa arnalǵan 3 jyldyq bıýdjette 235 mlrd teńge kózdelgen. Bul qarajat ınvestıtsııalyq sýbsıdııa men nesıe jáne lızıng tólemaqysyn tómendetetin sýbsıdııa úshin qarastyrylyp otyr. Jalpy Qazaqstanda óndiriletin azyq-túlik taýarlaryn el halqyna qoljetimdi jasaýǵa barlyq múmkinshilik bar dep sanaımyz», - dedi Erbol Qarashókeev.
