El halqynyń bankterge qaryzy 26 trln teńgeden asty
ASTANA. KAZINFORM — 2026 jylǵy shildede Qazaqstandaǵy halyqqa berilgen kredıtterdiń jalpy portfeli 1,2% ósip, 26,1 trln teńgege jetti. Jyl basynan beri bul kórsetkish 5,5% artqan.
Qarjy naryǵyn retteý jáne damytý agenttiginiń málimetinshe, ulttyq valıýtada berilgen kredıtterdiń ishinde tutynýshylyq qaryz kólemi 0,7% ósip, 17,4 trln teńge boldy. Al ıpotekalyq qaryz 2,4% ulǵaıyp, 7,6 trln teńgege jetti. Jyl basynan beri ıpotekalyq kredıt kólemi 9,7% ósken.
Shildede halyqqa teńgemen berilgen kredıtter boıynsha ortasha saralanǵan syıaqy mólsherlemesi 20,3% boldy. Maýsymda bul kórsetkish 19,5% bolǵan.
Ósim negizinen tutynýshylyq kredıtter boıynsha mólsherlemeniń 1,5 paıyzdyq tarmaqqa kóterilip, 22,5%-ǵa jetýimen baılanysty.
Al bızneske ulttyq valıýtada berilgen kredıtterdiń ortasha mólsherlemesi 21,5%-ǵa deıin tómendedi. Bul iri bızneske beriletin kredıtter boıynsha mólsherlemeniń 0,6 paıyzdyq tarmaqqa azaıyp, 18,8%-ǵa túsýine baılanysty boldy.
Problemalyq qaryz kólemi qandaı?
2026 jylǵy 1 tamyzdaǵy jaǵdaı boıynsha bankterdegi 90 kúnnen astam merzimi ótken qaryzdardyń úlesi 4,1% deńgeıinde saqtaldy. Mundaı qaryzdardyń jalpy kólemi 1,9 trln teńge boldy.
Halyqtyń kredıt portfelindegi NPL90+ qaryzdardyń úlesi 0,1 paıyzdyq tarmaqqa tómendep, 4,7% boldy. Aqshalaı kólemde bul — 1,2 trln teńge.
Al bıznes kredıtterindegi problemalyq qaryzdardyń úlesi kerisinshe 0,1 paıyzdyq tarmaqqa ósip, 3,9%-ǵa jetti. Onyń kólemi — 625 mlrd teńge.
Jumys istemeıtin qaryzdardy provızııalarmen jabý deńgeıi 60,4% boldy. Bir aı buryn bul kórsetkish 60,7% bolǵan.
Eske salaıyq, buǵan deıin Qazaqstanda ıpotekanyń úlesi kúrt ósip, kredıt ósiminiń 46,6% bolǵanyn jazǵanbyz.
