El halqynyń 68%-y keıingi úsh jylda ómir súrý jaǵdaıynyń jaqsarǵanyn baıqaǵan
ASTANA. KAZINFORM — Nazarbaev Ýnıversıteti janyndaǵy Ulttyq taldaý ortalyq (UTO) «Eldi mekenderdiń damýy men halyqqa arnalǵan ınfraqurylymdaǵy ózgeristerdi baǵalaý» taqyrybynda júrgizilgen zertteýdiń qorytyndylaryn usyndy.
Saýalnamaǵa qatysqandardyń 68%-y keıingi úsh jylda jaǵdaıdyń jaqsarǵanyn aıtqan. Respondentterdiń 82%-y qazirgi ómir súrý jaǵdaıyna kóńili tolatynyn bildirse, 68%-y aldaǵy úsh jylda jaǵdaıdyń odan ári jaqsaratynyna senedi.
UTO memlekettik saıasat ortalyǵynyń bas zertteýshisi Roza Tileýhannyń aıtýynsha, zertteý nátıjeleri halyqtyń elimizde júzege asyrylyp jatqan ınfraqurylymdyq ózgeristerdi oń qabyldaıtynyn kórsetedi. Sonymen qatar turǵyndar bul ózgeristerdiń kúndelikti ómirge naqty áserin sezinip otyr.
Turǵyndar kúndelikti ómir súretin ortadaǵy oń ózgeristerdi eń aldymen joldardyń jaı-kúıi, abattandyrý, saıabaqtar men kógaldandyrý salalarynan baıqaǵan. Bul baǵyttar eldi mekenderdi odan ári damytýda da basymdyqqa ıe bolyp otyr. Sonymen qatar halyq ınfraqurylymdy odan ári jetildirý máselesinde medıtsınalyq nysandardy, ınternet pen mobıldi baılanysty, sondaı-aq turǵyn úı-kommýnaldyq sharýashylyq salasyn damytýǵa erekshe mán beredi.
Saýalnama 2026 jyldyń shilde-tamyz aılarynda telefondyq suhbat ádisimen júrgizildi. Іrikteme eldiń barlyq óńirlerindegi 1 000 kámeletke tolǵan turǵyndardy qamtydy.
Zertteýdiń tolyq nátıjesi Ulttyq taldaý ortalyǵynyń saıtynda jarııalandy.
