El fýtbolyndaǵy eleýli oqıǵalar
Bıyl el fýtbolynda eleýli oqıǵalar az bolǵan joq. Ulttyq qurama 2024 jylǵy Eýropa chempıonaty irikteý satysynda óz tobynda úshinshi orynǵa turaqtady. Atalǵan dop dodasynda ulttyq quramanyń kapıtany Ashat Taǵybergenniń goly úzdik dep tanyldy. Sondaı-aq, qazaqstandyq komandalar eýrokýbok oıyndarynda táp-táýir nátıjege qol jetkizdi.
Kazinform elimizdiń fýtbol álemindegi basty oqıǵalarǵa sholý jasaıdy.
Úzdikter qatarynda úshtikten kórindi
Qazaqstandyq fýtbolshylar H tobynda synǵa tústi. Alǵashqyda fýtbol sarapshylary olardy óz tobynda sońǵy orynnyń birin mise tutady degen boljam jasaǵan edi. Dese de irikteý satysy barysynda el quramasy joǵary deńgeıde oıyn kórsete bildi.
Qurlyqtyq doda irikteý satysynda olar Danııa (3:2) men Fınlıandııa (1:0) quramalaryn bir márte tize búktirse, Coltústik Irlandııa (1:0, 1:0) men San-Marıno (3:0, 3:1) quramalaryn eki márte jeńdi. Al Danııa (1:3), eki márte Slovenııa (1:2, 1:2), Fınlıandııaǵa (0:1) ese jiberip qoıdy.
Qazaqstan quramasynyń 2023 jylǵy Eýropa chempıonatyna irikteý kezeńindegi on matchyn 245 578 kórermen tamashalady. Óz alańyndaǵy bes matchqa barlyǵy 144 396 kórermen keldi. Syrttaǵy bes kezdesýge 101 182 kórermen jınaldy.
Tórt quramaǵa - bir joldama
Qazaqstandyq quramanyń qurlyqtyq dodaǵa barýyna áli de múmkindik bar. Endi ÝEFA Ulttar lıgasy pleı-off satysy arqyly shyǵýǵa bolady.
El quramasynyń jartylaı fınal jáne fınaldyq oıyndaryn qaı alańda ótkizetini belgili boldy. Endi olar S jolymen 2024 jyldyń 21 naýryzynda jartylaı fınalda syrt alańda Grekııamen kezdesedi. Jeńgen jaǵdaıda 26 naýryzda taǵy da syrt alańda Grýzııa-Lıýksembýrg jubynyń jeńimpazymen sheberlik baıqasady.
Qazaqstandyq fýtbolshylar Eýropa chempıonaty irikteý satysynda besinshi márte baq synap otyr. Óz tobynda 2008, 2012 jyldarda - 6, 2016, 2020 jyldarda - 5 oryn aldy.
Ashat Taǵybergenniń aıtýly goly
Fýtboldan Qazaqstan quramasynyń jartylaı qorǵaýshysy Ashat Taǵybergenniń Danııa qaqpasyna soqqan goly 2024 jylǵy Eýropa chempıonatynyń irikteý satysyndaǵy úzdik atandy.
Ulttyq qurama kapıtany Ashat Taǵybergen 26 naýryz kúni 86-mınýtta Kasper Shmeıheldiń qaqpasyna gol soqqan edi. Sol oıynda bizdiń qurama 3:2 esebimen jeńiske jetti.
ÝEFA-nyń tehnıkalyq qadaǵalaýshy mamandary qurlyqtyq dodanyń irikteý satysyndaǵy úzdik on goldy anyqtaǵan edi. Odan keıin jankúıerlerdiń daýys berýine múmkindik jasaldy. Eýropalyq uıymnyń mamandary Ashat Taǵybergenniń alystan soqqan golyn segizinshi orynǵa laıyqty dep sanaǵan edi. Al jankúıerler arasynda ol birinshi orynǵa shyqty.
Ekinshi jáne úshinshi oryndarǵa Albanııa quramasynyń oıynshylary ıAsır Asanı men Krıstıan Aslanıdiń soqqan goldary laıyqty dep baǵalandy.
«Ordabasy» - jeńimpaz
Fýtboldan premer-lıga komandalary arasyndaǵy el birinshiliginde «Ordabasy» óz tarıhynda alǵash ret chempıon atandy. Shymkenttik klýb buǵan deıin 2017, 2019 jyldarda qola júldege qol jetkizdi.
Bıyl el birinshiligi asa tartysty jaǵdaıda ótti. Sońǵy týrlarǵa deıin komandalar bir-birinen ozyp kete alǵan joq. Bas júlde «Ordabasy», «Astana» jáne «Aqtóbe» klýbtary arasynda boldy.
Shymkenttik klýb bıyl qatarynan sheteldik jáne qazaqstandyq tájirıbeli komandalardy qosty. Nátıjesinde dop dodasy barysynda nátıjeli oıyndar ótkizdi. Jeńis tuǵyryna kóterildi.
Qazirge deıin el chempıony ataǵyna barlyǵy 10 komanda qol jetkizdi. Olardyń arasynan elordalyq «Astana» 7 márte jeńimpaz tuǵyryna kóterilse, Pavlodardyń «Ertis» jáne «Aqtóbe» – 5, almatylyq «Qaırat», semeılik «Elimaı», elordalyq «Jeńis» – 3, Qostanaıdyń «Tobyly» men Qaraǵandynyń «Shahteri» – 2, «Taraz» 1 márte altyn medal aldy.
Kakanyń shákirtteri Ózbekstanǵa barady
Fýtzaldan Qazaqstan quramasy 2024 jylǵy álem chempıonatyna joldama aldy. Osylaısha el quramasy dúbirli dodaǵa tórtinshi márte shyǵyp otyr. Onyń ishinde qatarynan úshinshi márte aıtýly alamanda baq synaýǵa múmkindik alyp otyrǵanyn aıta ketkenimiz artyq bolmas.
Aıta ketsek, el quramasy álem chempıonatynyń fınaldyq satysynda 2000, 2016, 2021 jyldarda synǵa tústi. Olar 2021 jyly 4-orynǵa taban tiredi.
A tobynda alty týrdan keıin 18 upaı jınaǵan Qazaqstan quramasy týrnır kestesinde birinshi oryn aldy. Olar bir týr buryn álem chempıonaty fınaldyq satysyna joldamaǵa qol jetkizgen edi.
El quramasy buǵan deıin Rýmynııany 2:0, 4:3, eki márte Nıderlandty 2:0, 2:0, Ázerbaıjandy 4:2, 3:2 esebimen tize búktirdi.
Osyndaı jetistiginen keıin el quramasy álemdik reıtıngte 6-orynǵa jaıǵasty. Álemdegi eń bedeldi Futsal Planet portalynyń reıtınginde Qazaqstan ulttyq quramasy 6-orynǵa ıe boldy.
Sondaı-aq, olar ÝEFA reıtınginde tórtinshi orynǵa taban tiredi. Bas bapker Rıkardo Kakanyń jetekshiligimen jattyǵatyn qurama qurlyqtyq reıtıngte tórtinshi orynǵa taban tiredi. Enshisinde 2416,503 upaı bar. Reıtıngte bizdiń quramadan joǵary Portýgalııa (2615,953 upaı), Ispanıı (2547,159) jáne Reseı (2486,456) ornalasqan.
