El erkesi Eralhannyń jeke kontserti bolady

Qazaqstannyń eńbek sińirgen qaıratkeri, ánshi, proıýdıýser Eralhan Álmahanulynyń alǵashqy kontserti 2003 jyly Respýblıka saraıynda "Aqqýym meniń qaıdasyń" degen taqyryppen ótken bolatyn.

"Ol ánshi Eralhannyń kontserti bolatyn. Bul ánshi, prodıýser Eralhannyń keshi bolmaq. Oǵan prodıýsser retinde óner álemine jolyn ashqan jeke jobalarymdy usynbaqpyn. Atap aıtqanda, ánshi Álııa Baıgózeva, pıanıst Dinmuhamed Asan jáne "Adem" dýeti, "Arý", "Ańyz" toptary men "Beımaral" teatry qatysady. Osy arada Kúlásh Baıseıitova atyndaǵy respýblıkalyq mýzyka mektebiniń oqýshysy D. Asan týraly az-kem aıta ketkim kep otyr. Álemde tehnıkasy eń jyldam pıanıst sanalatyn ony kóz tımesin degen oımen Rekordtar kitabyna usynǵan joqpyz. Túrli halyqaralyq baıqaýlarda oza shaýyp, ónerimen kúlli álemdi tamsandyrǵan jas talant qazir Eýropada ótetin kezekti óner báıgesine daıyndalyp júr", - deıdi "Murager" prodıýserlik ortalyǵynyń jetekshisi E.Ábishev.

Bıyl erdiń jasy 50-ge tolǵan Eralhan Álmahanuly Ońtústik Qazaqstan oblysynyń Shardara aýdanyndaǵy Kóksý aýylynda 1961 jyly 24 qańtarda dúnıege kelgen. Ol orta mektepti Keles aýdanyndaǵy «Birlik» keńsharynda bitirip, 1978 jyly Almaty mýzyka ýchılışesiniń, al 1984-1989 jyldary Qurmanǵazy atyndaǵy konservatorııanyń án bóliminde oqydy. «Dosmuqasan», «Almaty Varetesi», «Gúlder», «Altyn dán» ansamblderinde ánshi bolǵan E. Ábishev 1985 jyly respýblıkalyq «Jiger» festıvaliniń laýreaty jáne Búkilodaqtyq stýdent-jastar baıqaýynyń jeńimpazy boldy. Al 1990 jyly Máskeýde ótken stýdent-jastar óner festıvalinde, 1993 jyly Túrkııada bolǵan halyq mýzykasy men bıleriniń festıvalinde laýreat atandy. 1991-1997 jyldary Respýblıkalyq mádenıet úıinde bas dırıjer, kórkemdik jetekshisi ári dırektory. 1995-2003 jyldary «Tamasha» oıyn-saýyq otaýynda ánshi, budan keıin «Kúlki kerýeni» ázil-syqaq teatrynyń ánshisi ári prodıýseri boldy. Sondaı-aq 2007 "Murager" prodıýserlik ortalyǵyn, 2009 jyly "Beımaral" kúlki teatryn qurýǵa atsalysyp, oǵan jetekshilik jasady.