El energetıkasy qysqa qanshalyqty daıyn

Bul másele Energetıka mınıstrliginiń Memlekettik energetıkalyq qadaǵalaý jáne baqylaý komıteti janyndaǵy Respýblıkalyq shtabtyń kezekti otyrysynda qaraldy.

Jazǵy kezeńde eldegi energetıka nysandarynda aýqymdy jóndeý jumystary júrgizildi. Qazirgi ýaqytta elektr stantsııalaryndaǵy 4 energııa blogy, 28 qazandyq jáne 18 týrbına tolyq jóndelgen.

Sonymen birge 3 energııa blogy, 26 qazandyq jáne 21 týrbınada jóndeý jumystary áli jalǵasyp jatyr.

Jylý jelilerin daıyndaý boıynsha josparlanǵan 377 shaqyrymnyń 334 shaqyrymynda, ıaǵnı 88,6%-ynda jumystar aıaqtaldy.

— Elektr jelilerinde de negizgi jumys kólemi oryndaldy. Jylytý maýsymyna daıyndyq josparyna sáıkes 17 myń shaqyrymnan astam elektr berý jelisi kúrdeli jóndeýden ótti. Budan bólek, 444 qosalqy stantsııanyń 426-sy jáne 3408 taratý jáne transformatorlyq pýnkttiń 3385-i daıyndaldy, — dep habarlady vedomstvo.

Osylaısha, jylytý maýsymyn bastaýǵa qajetti stantsııalyq jabdyqtardyń negizgi quramy qalyptasty. Energetıkalyq nysandarda otynnyń normatıvtik qory da qamtamasyz etilgen.

— Jylytý maýsymyna daıyndyq josparly rejımde júrgizilýde. Jóndeý jumystarynyń negizgi kólemi oryndaldy. Qazirgi ýaqytta qalǵan is-sharalardy aıaqtap, jabdyqtar men jelilerdiń daıyndyǵyn qamtamasyz etý, sondaı-aq daıyndyq pasporttaryn alý úshin qujattardy ýaqtyly tapsyrý qajet, — dedi Komıtet tóraǵasy Erjan Ertaev.

Otyrysta erekshe baqylaýda turǵan nysandardyń daıyndyǵyna da jeke nazar aýdaryldy. Olar boıynsha naqty mindetter men merzimder belgilendi.

Óńirlik shtabtarǵa qalǵan jumystardy qysqa merzimde aıaqtap, qajetti materıaldar men jabdyqtardyń jetkizilýin jáne personaldyń tolyq jumyldyrylýyn qamtamasyz etý tapsyryldy.

Eske salaıyq, buǵan deıin Úkimet otyrysynda Premer-mınıstr Oljas Bektenov ákimderge energııa nysandarynyń qys mezgiline daıyndyǵyn baǵalaý jónindegi komıssııalardyń jumysyna tikeleı qatysýdy tapsyrǵan edi.