El eksportyn arttyrý: shet elderde saýda úıi, pavılon, keńse men qoımalar salynyp jatyr

ASTANA. KAZINFORM – Qazaqstan óz eksporttaýshylaryn qoldaý úshin shet elderde saýda núktelerin ashyp jatyr. Bul týraly «QazTrade» Saýda saıasatyn damytý ortalyǵy» AQ bas dırektory Aıtmuhammed Aldajarov aıtty. 

— Bizdiń ortaq maqsatymyz — eksportty ekonomıkalyq ósimniń, ónerkásiptik transformatsııanyń jáne eldiń jahandyq deńgeıdegi pozıtsııasyn kúsheıtýdegi negizgi qozǵaýshy kúshine aınaldyrý. Bul úshin jekelegen kómek kórsetý azdyq etedi, saraptaýǵa, tehnologııaǵa jáne nátıjege baǵyttalǵan júıeli model qajet. QazTrade dál osyndaı úlgini qalyptastyryp jatyr. Biz bólek-bólek sheshimderden biryńǵaı eksportty qoldaý ekojúıesine, ıaǵnı ıkemdi, tsıfrlyq jáne strategııalyq júıege ótip jatyrmyz, — dedi ol Qazaqstan eksporttaýshylar forýmynda.

Sondaı-aq spıker Qazaqstan búginde Qytaı, Ózbekstan, BAÁ, Iran jáne basqa da elderde saýda úıleri, pavılondar, keńseler men qoımalar jelisin damytyp jatqanyn atap ótti.

Odan bólek Sıan, Chýntsın, Kabýl qalalarynda saýda úıleri salynǵanyn, Termez, Dýbaı, Býdapeshte pavılondar ashylǵanyn, Úrimshide logıstıkalyq hab ashylǵanyn jáne jaqyn arada mundaı nysan Bender-Abbas (Iran) portynda da ashylatynyn aıtty.

— Shetelde naqty óz núkteń bolmasa — turaqty suranys ta, brendtiń tanymaldyǵy da bolmaıdy. Biz syrtqy saýda ınfraqurylymyn damytyp kelemiz. Bul nysandar jaı ǵana kórme alańdary emes, naqty saýda alańdary. Munda B2B kezdesýler ótedi, derekter jınalady, dıstrıbýtsııa jolǵa qoıylady. Biz naqty suranys bar jerge baryp, sol naryqtarǵa óz óndirýshilerimizdi alyp kelemiz, — dedi Aıtmuhammed Aldajarov.

Aıta keteıik, ótken jyly Qazaqstannyń eksport kólemi 80 mlrd dollardan asty.