El ekonomıkasynyń ósýi birshama baıaýlaýy múmkin - Ulttyq bank

«Halyqtyń naqty aqshalaı kirisiniń ósýi 2019 jylǵy qańtar-maýsymda 5,1 paıyz boldy. Aǵymdaǵy jyldyń ekinshi toqsanynda naqty jalaqy 8,9 paıyzǵa deıin ósti. Kórsetkishtiń ósýi ekonomıkanyń barlyq sektorlarynda baıqaldy. Tutynýshylyq suranystyń keńeıýine áleýmettik qoldaýǵa, jalaqyǵa bıýdjettik shyǵystardyń ulǵaıýy jáne tutynýshylyq kredıtteýdiń aǵymdaǵy jylǵy shildedegi jyldyq kórsetkish boıynsha 24,1 paıyzǵa ósýin saqtaý arqyly qoldaý kórsetiledi», - dedi Ulttyq bankten.

Taratylǵan aqparatqa qaraǵanda, 2019 jylǵy qańtar-shildede bólshek saýda aınalymynyń 5,4 paıyzǵa ósýi baıqalady. Tutynýshylyq ımport aǵymdaǵy jylǵy 1-jartyjyldyqta 4,8 paıyzǵa ósti. Negizgi úles 7,3 paıyzǵa ósken azyq-túlikke jatpaıtyn taýarlar ımportynyń bóliginde baıqalady. Іshki ekonomıkalyq belsendiliktiń ósýi Ulttyq banktiń kútýinen joǵary deńgeıde saqtalady. Aǵymdaǵy jylǵy qańtar-shildede qysqa merzimdi ekonomıkalyq ındıkator 4,4 paıyzǵa ulǵaıdy. Onyń ishinde qurylysta 11,5, saýdada 7,5, kólikte 5,4, aýyl sharýashylyǵynda 3,5 óńdeýshi jáne taý-ken óndirý ónerkásibinde tıisinshe 3,2 jáne 2,4 paıyzǵa ósti. Mundaı serpin 2019 jylǵy qańtar-tamyzda 11,3 paıyzǵa ósken ınvestıtsııalardyń keńeıýimen nyǵaıady. Importtalatyn ınvestıtsııalyq taýarlarǵa suranys iri ınfraqurylymdyq jáne ınvestıtsııalyq jobalardyń (TShO-ny keńeıtý, «Saryarqa» gaz qubyryn tartý jáne basqalary) iske asyrylýy nátıjesinde 24,9 paıyzǵa ulǵaıdy.

«Ulttyq banktiń baǵalaýy boıynsha, 2019 jyly Qazaqstannyń ekonomıkalyq ósýi 3,8 paıyzdy quraıdy. Orta merzimdi perspektıvada Qazaqstan ekonomıkasynyń ósý qarqyny birshama baıaýlaıdy. Biraq 2020 jyly salystyrmaly joǵary – 3,5 paıyzdyq mánde qalady. Qysqa merzimdi perspektıvada úı sharýashylyqtaryn tutyný men ınvestıtsııalyq belsendiliktiń ósýi negizgi qozǵaýshy kúsh bolady. Fıskaldyq yntalandyrý áseriniń álsireýi jáne taza eksport serpininiń tómendeýi nátıjesinde ekonomıkalyq ósýdiń keıinen baıaýlaýy boljanady», - dedi qarjylyq retteýshi.