El ekonomıkasynyń ósý qarqyny 3-4% bolady dep boljaımyz - Premer-Mınıstr

NUR-SULTAN. QazAqparat – Úkimettiń keńeıtilgen otyrysynda Premer-Mınıstr Álıhan Smaıylov el ekonomıkasynyń bıylǵy ósimi týraly boljamyn aıtty, dep habarlaıdy QazAqparat tilshisi.

«Syrtqy ekonomıkalyq jaǵdaı odan ári nasharlamasa, bıyl el ekonomıkasynyń ósý qarqyny 3-4%-ti quraıdy dep boljaımyz», - dedi Úkimet basshysy.

Sondaı-aq, ol atalǵan baǵyttaǵy jumystar jalǵasatynyna toqtaldy.

«Jalpy, jahandyq belgisizdik jaǵdaıynda, Úkimet ulttyq ekonomıkanyń turaqtylyǵyn qamtamasyz etý boıynsha keshendi sharalardy iske asyrýdy jalǵastyrady. Bul sharalar ekonomıkany ártaraptandyrýǵa, otandyq óndiristi damytýǵa, ásirese azyq-túlik taýarlaryn shyǵarýǵa, sapaly jumys oryndaryn qurýǵa baǵyttalǵan», - dedi Álıhan Smaıylov.

Aıta keteıik, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Buǵan deıin Úkimet basshysy bıýdjettiń shyǵys qarqynyn shektep, taý-ken sektorynan alynatyn salyq mólsherlemesin arttyrýdyń arqasynda bıyl kiris 40 paıyz artatynyn aıtty.

Foto: primeminister.kz