El ekonomıkasyna transulttyq kompanııany tartýda AEA-lar mańyzdy ról atqarady - A. Aıdarov
«5 ınstıtýttyq reformany júzege asyrý boıynsha 100 naqty qadam» - Ult josparynda Memleket basshysy ınvestıtsııalar tartý maqsatyna, sondaı-aq Qazaqstan ekonomıkasyna kem degende 10 transulttyq kompanııany tartýǵa aıryqsha mán berip otyr. Bul baǵytta tikeleı shetel ınvestıtsııalaryn tartý boıynsha alań retinde Arnaıy ekonomıkalyq aımaqtar mańyzdy ról atqarady. Bunda daıyn alańdar qajetti ınfraqurylymmen, tıisti salyqtyq jáne kedendik jeńildikter qamtylýda»,-dedi A. Aıdarov.
Atap aıtqanda, 2020 jylǵa deıin barlyq qoldanystaǵy Arnaıy ekonomıkalyq aımaqtardyń ınfraqurylymyn jasaqtaý aıaqtalady.
A. Aıdarovtyń sózine qaraǵanda, jalpy 2015 jyl Qazaqstandaǵy Arnaıy ekonomıkalyq aımaqtar úshin jemisti boldy.
«Qazirgi kezde AEA-larda jalpy quny 2,3 trln. teńgeden asatyn 166 joba iske asyryldy. Olardyń ishinde 34 iri joba sheteldik ınvestorlarmen birlesip jasalǵandar. 2015 jyldyń qurylysyna toqtalatyn bolsaq, byltyr Arnaıy ekonomıkalyq aımaqtarda jalpy quny 88 mlrd. teńgeden asatyn 17 iri joba júzege asyryldy. Osy jobalar tolyq kúshine engennen keıin 2 myńnan astam jumys oryndary qamtylady»,-dedi A. Aıdarov.
Al 2016 jyly barlyq 10 Arnaıy ekonomıkalyq aımaqtardyń aýmaǵynda jalpy 500 mlrd. teńge somadaǵy 53 jobany iske qosý josparlanyp otyr.
Aıta keteıik, Memleket basshysy Nursultan Nazarbaevtyń «Ult jospary - qazaqstandyq armanǵa bastaıtyn jol» atty jaqynda jarııalanǵan maqalasynda Ult josparynyń ekonomıkalyq blogyna kiretin sharalar bizdiń ekonomıkamyzdyń óńdeýshi sektoryna kem degende 10 transulttyq korporatsııany tartýdy qarastyratyny atap ótilgen. «Zákirli ınvestorlarmen» birlesken kásiporyndar qurý jónindegi jumystarmen óńdeýshi ónerkásiptiń, ınfraqurylymdardyń, energetıkanyń jáne basqa otandyq kompanııalardyń 3 toby qamtylatyn bolady.
