El ekonomıkasy ornyqty ósim kórsetip keledi — Oljas Bektenov

ASTANA. KAXINFORM — Premer-mınıstr men Úkimet músheleriniń qatysýymen ótken AMANAT partııasy fraktsııasynyń keńeıtilgen otyrysynda Prezıdenttiń 2019-2024 jyldar aralyǵyndaǵy Qazaqstan halqyna Joldaýy men «Ádiletti Qazaqstan: bárimiz jáne árqaısymyz úshin. Qazir jáne árdaıym» saılaýaldy baǵdarlamasynyń iske asyrylý barysy qaraldy. Bul týraly Úkimettiń baspasóz qyzmeti málim etti.

Oljas Bektenov makroekonomıkalyq turaqtylyq pen qarjylyq ornyqtylyq syrtqy syn-qaterler aıasynda Úkimettiń basymdyǵy bolyp qala beretinin atap ótti.

Premer-mınıstr Oljas Bektenov Úkimet Memleket basshysynyń eldi ornyqty damytýǵa jáne azamattardyń ómir súrý sapasyn arttyrýǵa baǵyttalǵan strategııalyq bastamalaryn dáıekti túrde iske asyryp jatqanyn atap ótti.

— Memleket basshysynyń saıası baǵdarynyń arqasynda el ekonomıkasy ornyqty ósim kórsetip keledi. Jeti aıdyń qorytyndysyna sáıkes óńdeý ónerkásibinde oń úrdis saqtaldy. Taý-ken ónerkásibinde sırek jáne jerde sırek kezdesetin metaldardy ıgerý boıynsha ósýdiń jańa baǵyttaryn kórip otyrmyz,— dep atap ótti Premer-mınıstr.

Agrarlyq sektor da ósim kórsetp otyr. Aýyl sharýashylyǵy óndirisiniń kólemi 3,7%-ǵa ulǵaıdy. Sharýalarǵa tolyqtaı jáne ýaqtyly kórsetilgen qoldaý sharalary bıyl elimizdi mol ónimmen qamtamasyz etýge, eksporttyq kórsetkishterdiń ósýine yqpal etýge tıis. Qurylys jumystarynyń kólemi 18,5%-ǵa, saýda 8,6%-ǵa, kólik salasy 22,5%-ǵa ulǵaıdy.

Sondaı-aq Ulttyq bankpen birlesip, ınflıatsııany tómendetý sharalary qabyldanyp jatyr. Baǵanyń kúrt ósip ketýine jol bermeý úshin óńirler kúzgi kókónisterdi turaqtandyrý qorlaryna satyp alý rásimderin aıaqtaýǵa jaqyn. Bul osy ónimderdiń jyl boıy qoljetimdi bolýyn qamtamasyz etedi.