El ekonomıkasy óńdeý jáne qurylys sektorlary esebinen ósti

ASTANA. KAZINFORM — 2024 jylǵy qorytyndy boıynsha JІÓ ósýin aldyn ala baǵalaý 5%-ǵa deıingi arttyrý jaǵyna qaraı qaıta qaraldy.

Ulttyq statıstıka bıýrosynyń resmı deregine sáıkes, el ekonomıkasynyń qorytyndy ósýi 2024 jylǵy qorytyndy boıynsha 5%.

Budan buryn, JІÓ ósýi aldyn ala 4,8%-ǵa baǵalanǵan.

USB aqparaty boıynsha, 2024 jylǵy ekonomıkalyq ósý edáýir deńgeıde munaıǵa jatpaıtyn sektordyń damýy arqyly qamtamasyz etilip otyr.

— Taýar óndirisi 6,3%-ǵa artyp (aldyn ala derek -5,5%), qyzmet kórsetý sektory 4,6%-ǵa ósýdi kórsetti. Ózekti faktordyń biri óńdeý ónerkásibindegi óndiris kóleminiń 6,8%-ǵa (buryn -5,9%) ósýi. Bul 2011 jyldan bergi eń joǵary kórsetkish. Qurylys sektory 15,3%-ǵa (buryn — 13,1%), aýyl sharýashylyǵy 13,7%-ǵa (buryn — 13,3%) aıtarlyqtaı úles qosty. Baılanysty salalar da oń serpin kórsetken. Іshki saýda kólemi 8,9%-ǵa (buryn — 8,8%), kólik pen qoımalaý qyzmeti 9,4%-ǵa (buryn — 8,5%) artty, — delingen Ulttyq statıstıka bıýrosynyń habarlamasynda.

Qol jetkizilgen nátıje naqty sektordy qoldaý, kólik-logıstıkalyq ınfraqurylymdy damytý, ınvestıtsııalyq belsendilikti yntalandyrý men qarjy quralyna qol jetkizýdi arttyrý sharasynyń arqasynda júzege asty.

Ekonomıkalyq saıasatty keshendi iske asyrý ishki suranysty nyǵaıtýǵa, kásipkerlik belsendiliktiń ósýine, óndiristik áleýetti arttyrýǵa yqpal etti. Osylaısha, mańyzdy salalardaǵy, ásirese, taý-ken ónerkásibiniń (12%) úlesinen asyp túsetin JІÓ 12,4%-y —óńdeý ónerkásibindegi oń serpin esebinen ekonomıkanyń odan arǵy ornyqty ósýi men ártaraptandyrylýyna negiz jasaldy. 

Aıta ketelik Úkimet basshysy JІÓ-ni 450 mlrd dollarǵa jetkizý órshil, biraq múmkin mindet ekenin aıtqan edi.