El damýy ózgeristi talap etedi
ASTANA. QazAqparat - Bıyl Joldaýdyń aldynda ǵana Prezıdent N. Á. Nazarbaev «Qazaqstan Respýblıkasy Prezıdentiniń bılik tarmaqtary arasynda ókilettikterdi qaıta bólý máseleleri jóninde halqymyzǵa Úndeý jarııalaǵany belgili. Onda ýaqyt talabyna oraı memlekettik basqarý júıesin jańǵyrtý máselesi kóterilgen edi. «Reforma eki negizgi baǵyt boıynsha iske asady, - degen edi Elbasy osy Úndeýinde.
- Birinshiden, Prezıdenttiń áleýmettik-ekonomıkalyq protsesterdi retteýdegi birshama ókilettikterin Úkimetke jáne basqa da atqarýshy organdarǵa bergen jón. Sonda bul salaǵa Úkimet, mınıstrlikter jáne ákimdikter tolyqtaı jaýap beretin bolady. Ókilettikterdi berý tıisti zańdardy ózgertý arqyly iske asady. Ekinshiden, ...bılik tarmaqtary arasyndaǵy qarym-qatynasty konstıtýtsııalyq deńgeıde teńgerimdi etý kerek. Osy reformanyń aıasynda Úkimetti jasaqtaýdaǵy Parlamenttiń rólin kúsheıtemiz».
Árıne, bul reformalardyń bári de Konstıtýtsııanyń tıisti baptaryn ózgertý, oǵan tıisti tolyqtyrýlar engizý arqyly júzege asyrylatyny belgili. Osyǵan baılanysty, ústimizdegi jyldyń 26 qańtary men 26 aqpany aralyǵynda el Konstıtýtsııasynyń jekelegen baptaryna ózgerister engizý jónindegi joba boıynsha búkilhalyqtyq talqylaý ótkizilip, 2017 jylǵy 3 naýryzda halyqtan túsken usynystar memleketimiz Parlamenti Palatalarynyń birlesken májilisinde qoldaý tapty. Parlament Palatalarynyń birlesken otyrysynda sóz sóılegen Memleket basshysy N. Á. Nazarbaev Qazaqstan Respýblıkasy Konstıtýtsııasyna ózgerister engizý arqyly júzege asyrylatyn saıası reformalardyń basty faktorlary men aspektilerin atap kórsetti.
«Meniń Jarlyǵymmen ázirlengen konstıtýtsııalyq reformalar jobasy bir aı boıy ótken búkilhalyqtyq talqylaýǵa salyndy. Ár adam usynys berý quqyǵyna ıe boldy», - dedi Elbasy. Eń bastysy, jańa zań Parlamenttiń memlekettik isterdegi, sonyń ishinde Úkimetti jasaqtaýdaǵy rólin aıtarlyqtaı kúsheıtedi. Sondaı-aq ekonomıkany tikeleı basqarý jónindegi ókilettilikter beriletin Úkimettiń derbestigi artady. Jáne de quqyq qorǵaý men sot júıesiniń konstıtýtsııalyq negizi jańartylady. Zańdardyń saqtalýyn joǵary deńgeıde baqylaý, sotta memleket múddesin qorǵaý jaıyn qarastyratyn prokýratýra qyzmetiniń bazalyq negizderi qalanady. Konstıtýtsııalyq baqylaý júıesi de nyǵaıa túsedi. Táýelsizdigimizdiń, birtutastyǵymyzdyń, aýmaqtyq tutastyq pen basqarý nysanynyń ózgermeıtinine konstıtýtsııalyq deńgeıde beriletin kepildik kúsheıe túsedi.
Elbasy N. Á. Nazarbaev osy jıynda bıliktiń barlyq tarmaǵynyń joǵary kásibıligin, olardyń ózine jaýapkershilik alyp, sheshim qabyldaı alatyn qabileti artatynyn atap kórsetti. Sonymen qatar, Qazaqstan Prezıdenti prezıdenttik basqarý júıesiniń saqtalatynyn, memleket pen qoǵamdy odan ári jańǵyrtý úshin saıası jaǵdaılar jasaý maqsatymen júrgizilip jatqan reformalar baǵytynyń ózgermeıtinin málimdedi. Qos palataly Parlamenttiń birlesken otyrystarynda zań jobasy birinshi oqylymda maquldanyp, ol 6 naýryzdaǵy birlesken májilisinde ekinshi ret talqylanyp qabyldandy.
Joldaýda aıtylǵan Qazaqstannyń úshinshi jańǵyrylýy Konstıtýtsııadaǵy ózgeristermen baıandy bolatyny búkil eldiń bolashaqqa degen senimin arttyryp, kóńilderin ornyqtyrýda. Bul baǵyttaǵy ózgerister óz keziginde el damýyna erekshe serpin berip, damyǵan 30 memlekettiń qataryna qosylýǵa múmkindikti arttyra túsetini kámil.
