El chempıony «Taraz» jańa birinshilikti jeńispen bastady

ATYRAÝ. KAZINFORM – Atyraý qalasynda voleıboldan erlerdiń ulttyq lıga komandalary arasynda HHHІІІ Qazaqstan chempıonaty alǵashqy týrynyń oıyndary bastaldy.

Birinshi bolyp alańǵa el chempıony «Taraz» ben «Ushqyn-Kókshetaý» komandalary shyqty.

Bıyl naýryzda fınalda «Pavlodardy» jeńgen tarazdyqtar óz tarıhynda ekinshi ret Qazaqstan chempıony atansa, kókshetaýlyqtar sońǵy, 9-orynǵa ıe bolyp, shırek fınaldan tys qalǵan edi. 

Bul joly Aleksandr Stolnıkov baptaıtyn «Ushqyn-Kókshetaý» matchty tym-táýir bastaǵanymen, «Taraz» kóp uzatpaı-aq oıyn tizginin qolyna aldy. Aqyry ıÝrıı Bashkatovtyń shákirtteri 3:0 (25:18, 25:14, 25:14) esebimen jańa maýsymdaǵy alǵashqy jeńisine qol jetkizdi. 
Birinshi týr 27 qarasha kúni máresine jetedi.

Senbi kúni «Taraz» ben bıylǵy el kýbogynyń jeńimpazy «Aqtóbe» komandalary sýperkýbokty sarapqa salady. 

Eske sala keteıik, budan buryn Óskemende áıelder komandalary arasynda voleıboldan el chempıonaty birinshi týrynyń oıyndary aıaqtalǵanyn jazǵan bolatynbyz.