El chempıonatynda «Atyraýdy» utqan «Aqjaıyq» onynshy orynǵa kóterildi
ORAL. QazAqparat - Fýtboldan Qazaqstan chempıonatynyń 17-týrynda Oraldyń «Aqjaıyǵy» óz alańynda «Atyraýdy» qabyldady, dep habarlaıdy QazAqparat tilshisi.
Buǵan deıin atyraýlyqtar 22 upaımen jetinshi orynda bolsa, oraldyqtar 13-satyda edi.
Birinshi aınalymda Atyraýda Oralhan Ómirtaev jeńis golyn soǵyp, «Aqjaıyq» utyp ketken edi.
Bul joly 8-mınýtta atyraýlyq qaqpashy men qorǵaýshynyń qateliginen soń reseılik Artýr Gazdanov esep ashty.
20-mınýtta «Aqjaıyqtyń» surmergeni, grýzııalyq shabýylshy Toma Tabatadze esepti 2:0-ge jetkizdi.
34-mınýtta aıyp doby oryndalǵannan keıin «Atyraý» sapyndaǵy polıak oıynshysy Petr Gjelchak qaqpany dál kózdedi.
Degenmen birinshi taım sońynda T.Tabatadze 11 metrlik núkteden múlt ketken joq - 3:1.
Ekinshi taımda 68-mınýtta «Aqjaıyq» kapıtany, reseılik qorǵaýshy Sergeı Shýstıkov óz qaqpasyna gol soǵyp aldy.
Áıtse de arada 10 mınýt ótkende Oralhan Ómirtaev matchtyń núktesin qoıdy - 4:2.
Osylaısha, qatarynan eki jeńiske qol jetkizgen «Aqjaıyq» 18 upaımen týrnır kestesinde onynshy orynǵa kóterildi.
Kelesi týrda 4 qyrkúıekte «Atyraý» «Kaspııdi» qabyldasa, bir kúnnen keıin oraldyqtar elordada «Astanamen» oınaıdy.
Eske sala keteıik, budan buryn Qazaqstan chempıonatynda «Aqjaıyqtyń» «Kaspııdi» 2:0 esebimen jeńgenin jazǵan bolatynbyz
Sýretterdi túsirgen Aıbatyr Nurash
