El bıýdjetiniń úsh donor óńiri belgili boldy
ASTANA. KAZINFORM — Búginde óńirlerdiń ortalyq bıýdjetke táýeldiligi 49 paıyz deńgeıinde saqtalyp otyr.
Bul týraly Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
— 2008 jyldan bastap bıýdjetaralyq qatynastar turaqty sıpatqa ıe jáne bıýdjettik alyp qoıýlar men sýbventsııalar kólemi ózgerissiz 3 jylǵa zańmen bekitiledi. Úsh jyldyq kezeńge sýbventsııalar men alyp qoıýlardy bekitý óńirler úshin yntalandyrýshy sıpatqa ıe jáne ákimderdiń qosymsha tabysty jergilikti mańyzy bar máselelerdi sheshýge derbes jumsaýyna múmkindik beredi. Bıýdjetaralyq qatynastar júıesin jetildirý jónindegi jumys turaqty túrde júrgiziledi, — dedi Serik Jumanǵarın Májiliste ótken Úkimet saǵatynda.
Búginde negizgi basymdyqtar berilip otyr:
— óńirlerdiń óz áleýetin jáne ekonomıkalyq derbestigin iske asyrýy úshin jaǵdaı jasaý;
— bazalyq ınfraqurylymda jáne jalpy damýda asa úlken alshaqtyqtarǵa jol bermeý.
— Búginde 20 óńirdiń 17-si sýbventsııalyq, ortalyqqa táýeldilik 49 paıyz deńgeıinde saqtalyp otyr. Qalǵan úsh aımaq — Almaty, Astana qalasy jáne Atyraý oblysy donor bolyp otyr. Biraq bul «shartty» kórsetkish ekenin moıyndaý kerek, ortalyqtan qosymsha transfertterdi donor aımaqtar da alyp otyr. Megapolıs qalalarda, oblystarda iri jobalardyń kópshiligi ortalyqtan júzege asyrylady. Bul degenimiz metropolıten qurylysy, Astana qalasynyń jańa kólik júıesi, ıaǵnı LRT, jaıly mektepter, kóliktik jáne ózge de ınfraqurylymdy damytý jobalary. Úkimet jumysynyń odan ári ekpini damý ınstıtýttarynyń qarqynyn, ınfraqurylymdyq jobalardy qarjylandyrýdyń bıýdjetten tys quraldaryn, memlekettik qoldaý sharalaryn damytý arqyly óńirlerdiń ekonomıkalyq derbestigin qamtamasyz etýge baǵyttalady. Jalpy, qabyldanyp jatqan sharalardan salyq salý bazasynyń odan ári keńeıýi, jalpy óńirlerdiń salyq áleýetiniń damýy kútiledi, — deıdi mınıstr.
Búgin Májiliste «Jalpy sıpattaǵy transfertterdi aıqyndaý jónindegi jańa tásilder» taqyrybynda Úkimet saǵaty ótip jatyr.
Eske salaıyq, mamyrda respýblıka bıýdjetine transfert aýdaratyn jańa donor óńirler paıda bolatyny týraly habarlaǵan edik.