El boıynsha qurylǵan 20 mobıldi beket avtobýstar men júk kólikterin baqylaýǵa kiristi - Kóliktik baqylaý komıteti
ASTANA. Naýryzdyń 26-sy. QazAqparat /Jasulan Amanbaıuly/ - Respýblıka avtojoldarynda jolaýshylar jáne júk tasymaldaıtyn avtokólikter kóshpeli kóliktik baqylaý beketterinde tekseriletin bolady. Búginde respýblıka deńgeıindegi joldarda 20 bekettiń jumysy uıymdastyrylǵan.
Búgin Astanadaǵy osyndaı beketterdiń qyzmetimen tanystyrý kezinde Kóliktik baqylaý komıtetiniń basqarma bastyǵy Bolat Smaǵulov, bıyl kóshpeli beketterdi uıymdastyrý maqsatynda zamanaýı baqylaýdyń tehnıkalyq quraldarymen jaraqtalǵan arnaıy kólikter satyp alynǵandyǵyn málim etti. Jyl sońyna deıin taǵy 16 mamandandyrylǵan kólik alý josparlanǵan.
Kólik baqylaýshylardyń aıtýynsha, mobıldi beketter engizý - jolaýshylar men júk tasymaly qaýipsizdik deńgeıin joǵarylatýǵa, jolaýshylardyń zańsyz tasymaldaý oryndaryn anyqtaýǵa múmkindik bermek.
«Respýblıkanyń iri qalalarynda, eldi mekenderde jeke menshik tasymaldaýshylardy, avtobýstardy baqylaýǵa alý qıynǵa soǵýda. Bul olqylyqty joıýdyń bir amaly respýblıkalyq deńgeıdegi jáne qalaaralyq tasjoldarda kóshpeli beketter ornatý», deıdi B. Smaǵulov.
Kóliktik baqylaý komıteti bastyǵynyń buıryǵymen kóshpeli beketter naýryzdyń 12-sinen bastap jumys jasaýda.
