El boıynsha Apattar medıtsınasy ortalyǵynyń qyzmetkerleri qan tapsyrý aktsııasyn ótkizdi
ASTANA. KAZINFORM – Jyl saıyn 14 maýsymda Dúnıejúzilik qan donory kúni atap ótiledi.
Qan donorlyǵy azamattyq jaýapkershilik pen yntymaqtastyqtyń mańyzdy kórinisi. Dúnıejúzilik qan donor kúni qarsańynda Apattar medıtsınasy ortalyǵy men onyń elimizdiń túkpir-túkpirindegi 20 fılıalynyń qyzmetkerleri donorlyq aktsııaǵa qatysty.
Árbir qan tapsyrý tótenshe jaǵdaılardan zardap shekkenderge, otadan keıingi patsıentterge jáne ártúrli aýrýlardan emdelip jatqan adamdarǵa shuǵyl medıtsınalyq kómek kórsetý úshin qajetti qan qorlaryn tolyqtyrýǵa kómektesedi.
Apattar medıtsınasy ortalyǵy qyzmetkerleriniń donorlyq qozǵalysqa qatysýy ıgi dástúrge aınaldy. Aktsııa aıasynda ortalyq apparat pen respýblıka boıynsha barlyq fılıaldyń qyzmetkerleri jalpy kólemi 40 lıtrden astam qan tapsyrdy. Bul qor ondaǵan adamnyń ómirin saqtap qalýǵa septigin tıgizedi.
Ótkizilgen aktsııa búkil eldegi fılıaldardyń ujymdaryn biriktirip, ózara kómek, meıirimdilik pen áleýmettik jaýapkershiliktiń mańyzdylyǵyn taǵy bir márte eske saldy. Apattar medıtsınasy ortalyǵynyń qyzmetkerleri úshin adamdarǵa kómektesý tek kásibı paryz ǵana emes, sonymen birge ómirlik ustanym.
Apattar medıtsınasy ortalyǵy aktsııanyń barlyq qatysýshylaryna beı-jaı qaramaǵandary, janashyrlyqtary jáne adamdardyń ómiri men densaýlyǵyn saqtaý jolynda eń qundy dúnıesimen bólisýge daıyn bolǵandary úshin shyn júrekten alǵys bildiredi.
Aıta ketelik Almatydaǵy Donorlyq festıvalinde 36 lıtrden astam qan jınalǵan edi.
