Balalarǵa qatygezdik kórsetken 12 ata-anaǵa qylmystyq is qozǵaldy
ASTANA. KAZINFORM — 10 sáýir men 6 mamyr aralyǵynda elimizde «Jasóspirim» jedel-profılaktıkalyq is-sharasy ótkizilip jatyr, dep habarlaıdy ІІM baspasóz qyzmeti.
Ol balalardyń quqyqtaryn qorǵaýǵa, quqyq buzýshylyqtardyń aldyn alýǵa, qoǵamdyq tártipti buzý faktilerine jol bermeýge baǵyttalǵan, — dep habarlaıdy Polisia.kz.
Іs-shara bastalǵaly polıtsııaǵa 13 myńǵa jýyq jasóspirim jetkizildi, onyń ishinde: qylmys jasaǵany úshin 70-ten astam; ákimshilik quqyq buzýshylyq jasaǵany úshin toǵyz myńnan astam; qaraýsyz jáne panasyz qalǵan úsh myń.
— Polıtsııa túngi ýaqytta oıyn-saýyq mekemelerinde jáne kóshelerde bolǵan 11 myńnan astam kámeletke tolmaǵandy anyqtap, ata-analaryna tapsyrdy. Balalarǵa alkogol satýdyń 148 faktisi toqtatyldy. Kóshelerde mas kúıinde 229 bala ustaldy. Qabyldanǵan sharalar balalarǵa qatysty qylmysty boldyrmaýdy kózdeıdi. Ata-analarǵa kámeletke tolmaǵandardyń ómiri men qaýipsizdigi úshin jaýapty ekenin eske salamyz, — dedi ІІM ákimshilik polıtsııa komıtetiniń basqarma bastyǵy Áset Ospanov.
Іs-shara barysynda balalaryna durys tárbıe bermegeni úshin 1600-den astam ata-ana ákimshilik jaýapkershilikke tartyldy. Balalarǵa qatygezdik kórsetkeni úshin 12 ata-anaǵa qylmystyq is qozǵaldy. Jastardyń quqyqtyq sanasyna yqpal etý maqsatynda bilim berý uıymdarynda 10 ashyq sot otyrysy ótkizildi. Qoǵamǵa jat minez-qulqy bar 600-den astam jasóspirim jáne bala tárbıesimen aınalyspaıtyn 500-den astam ata-ana anyqtalyp, esepke qoıyldy.
Jasóspirimderden 50-ge jýyq tyıym salynǵan zattar, onyń ishinde eki qarý, 39 suqpaly-kesý zaty jáne alty esirtki zaty tárkilendi. Balalardyń ómiri men densaýlyǵyna qaýip tóndiretin úsh myńnan astam ınternet-saıt anyqtaldy. Onyń 600-den astamy buǵattaldy. Ákimdikterge mektep janyndaǵy jol qaýipsizdigin jaqsartý boıynsha 1300-den astam nusqama berildi. Sondaı-aq balalardyń bos ýaqytyn uıymdastyrý týraly 200-den astam ótinish joldandy.
— Qurmetti azamattar! Balalardyń bos ýaqytyn ótkizýine erekshe nazar aýdarýdy suraımyz. Onyń qaıda jáne kimmen ekenin bilý qajet. Balalardyń ómiri men qaýipsizdigine qaýip tóngen jaǵdaıda dereý «102» nómiri boıynsha polıtsııaǵa habarlasyńyz. Іshki ister mınıstrligi olardyń qaýipsizdigin qamtamasyz etý boıynsha jumysty jalǵastyrady, — dedi Áset Ospanov.
Buǵan deıin Almaty áýejaıynda jasóspirim sómkede jarylǵysh zat baryn habarlady.