El boıynsha 1 333 saılaý ýchaskesi múgedektigi bar adamdarǵa tolyq beıimdelmegen

Elimiz boıynsha 9 015 saılaý ýchaskesi qoljetimdilik kartasyna engizilip, ár nysannyń múgedektigi bar adamdar úshin qanshalyqty yńǵaıly ekenine taldaý júrgizildi. Eńbek jáne halyqty áleýmettik qorǵaý mınıstrligi jergilikti atqarýshy organdarmen jáne saılaý komıssııalarymen birlesip júrgizgen monıtorıng nátıjesinde 1 333 ýchaskede qosymsha beıimdeý jumystaryn júrgizý qajet ekeni anyqtaldy. Bul jumys daýys berý kúnine deıin jalǵasady.

Múgedektigi bar adamdar úshin saılaý ýchaskesiniń qoljetimdiligi tek kireberistegi pandýspen shektelmeıdi. Mańyzdysy — ár azamattyń ýchaskege ózdiginen, kedergisiz kirip, ǵımarat ishinde erkin qozǵalyp, daýys berýge qajetti barlyq quraldardy paıdalana alýy.

Azamattardyń qajettiligine qaraı saılaý ýchaskelerinde mynadaı jaǵdaılar qarastyrylady:

— pandýstar nemese kótergish qurylǵylar;

— kómek shaqyrýǵa arnalǵan batyrmalar;

— taktıldi kórsetkishter;

— eni belgilengen talaptarǵa sáıkes keletin esik oıyqtary

— jetkilikti jaryqtandyrý;

— arnaıy avtoturaq oryndary;

— kórý jáne estý qabileti buzylǵan adamdarǵa arnalǵan arnaıy quraldar;

— Braıl qarpimen jazylǵan aqparattyq materıaldar;

— ymdaý tili mamandary men tıflosýrdoaýdarmashylardyń kómegi.

Elimizde saılaýǵa qatysý jasyna jetken 325 myńnan astam múgedektigi bar azamat turady. Olardyń arasynda tirek-qımyl apparaty, kórý jáne estý qabileti buzylǵan, sondaı-aq kreslo-arbamen júrip-turatyn adamdar bar.

— Daýys berý kúni jergilikti atqarýshy organdar ınvataksı qyzmetiniń jumysyn qamtamasyz etýi tıis. Múgedektigi bar azamattar saılaý ýchaskesine barmas buryn onyń qoljetimdilik deńgeıi men jasalǵan jaǵdaılar týraly aqparatpen aldyn ala tanysa alady. Qajet bolǵan jaǵdaıda saılaýshyǵa ózi tańdaǵan adamnyń kómegin paıdalanýǵa ruqsat etiledi. Al densaýlyǵyna baılanysty ýchaskege kele almaıtyn azamattar belgilengen tártippen óz úıinde daýys bere alady, — delingen habarlamada.

Saılaý ýchaskeleriniń qoljetimdiligi boıynsha eń joǵary kórsetkishter Astana men Shymkentte tirkelgen. Almaty qalasynda da kórsetkish joǵary.

Qosymsha beıimdeý sharalaryn júrgizý qajettiligi eń aldymen Qostanaı, Aqmola jáne Soltústik Qazaqstan oblystarynda qajet.

QR Eńbek jáne halyqty áleýmettik qorǵaý mınıstrliginiń Áleýmettik qorǵaý salasyndaǵy retteý jáne baqylaý komıtetiniń aýmaqtyq departamentteri saılaý ýchaskeleriniń daıyndyǵyn tekserip jatyr. Bul jumystar ákimdiktermen jáne saılaý komıssııalarymen birlesip júrgizilýde. Anyqtalǵan kedergilerdi joıý boıynsha da tıisti jumystar jalǵasyp keledi.

Budan buryn Qazaqstanda 31,6 myńnan astam nysan múgedektigi bar adamdar úshin beıimdelgenin jazdyq.