«El bolashaǵynyń besigi» atty kórme elordany kóshirý týraly ıdeıanyń 20 jyldyǵyna arnalady
ASTANA. QazAqparat - 2 shildede QR Tuńǵysh Prezıdenti mýzeıinde astanany kóshirý týraly ıdeıanyń 20 jyldyǵyna jáne Qala kúnine arnalǵan «El bolashaǵynyń besigi» atty qujattyq kórmeniń ashylýy bolady.
Kórme Mýzeıdiń seriktestik jobasy aıasynda Qazaqstan Respýblıkasynyń Ulttyq muraǵatymen birlesip uıymdastyrylady.
Osydan 20 jyl buryn, 6 shildede 1994 jyly N.Á. Nazarbaev, Qazaqstan Respýblıkasy Joǵarǵy Keńesiniń plenarlyq májilisindegi sóılegen sózinde, astanany kóshirý týraly ıdeıasyn Parlament depýtattarynyń talqysyna salǵan bolatyn.
Kórmeniń mańyzdy ereksheligi, onyń ekspozıtsııasy ornalasqan ǵımarat táýelsiz Qazaqstan astanasynyń tarıhymen tikeleı baılanysty.
Naq osy QR Tuńǵysh Prezıdenti mýzeıiniń ǵımaratynda, Astanadaǵy Memleket basshysynyń alǵashqy rezıdentsııasynda 1997 jyldyń 10 jeltoqsanynda, QR Úkimeti men Parlament palatasynyń birlesken saltanatty májilisinde Aqmola qalasy Qazaqstannyń astanasy bolyp arnaıy jarııalandy.
Sol kúni Rezıdentsııanyń Kúmbezdi zalynda (qazirgi - Mýzeı) Prezıdentimiz «Budan bylaı jáne ǵasyrdan-ǵasyrǵa ulan-baıtaq jerdiń kindiginde ómirsheń mańyzy bar sheshimder qabyldanatyn bolady. Bul jerde endi Otanymyzdyń júregi soǵady, osy jerden Qazaqstan úshinshi myńjyldyqtyń tabaldyryǵynda óziniń tarıhı taǵdyryn aıqyndaıtyn bolady» degen shynaıy yqylastan týǵan sózin jetkizdi.
Osy jerde, Mýzeıdiń Altyn zalynda, alǵash ret qala qurylysynyń bas jospary jaıylǵan bolatyn, onda Bolashaqtyń qalasy qandaı bolýy kerek ekendigi týraly sheshim qabyldanǵan edi. Barlyǵyna belgili, kóptegen ǵımarattar, qalanyń eskertkishteri, sýretter sekildi, syzbalar men jobalar Prezıdenttiń qııalynan týyndaǵan. Ekspozıtsııaǵa osylardyń negizinde salynǵan ǵımarattardyń biregeı maketteri men syzba nusqalary qoıylatyn bolady.
Kórmege kelýshiler alǵash ret úlken kólemde usynylyp otyrǵan, jıyrma jyl ishindegi baıandalǵan uzaq joldar týraly, muraǵattyq materıaldar toptamasynan kóre alady. QR Ulttyq muraǵatynyń biregeı qujattyq jınaǵy men QR Tuńǵysh Prezıdentiniń muraǵattyq jınaǵynan usynylǵan materıaldar Astana tarıhyn baıandaıtyn jaǵymdy ózgerister kezeńin tolyqtaı túsinýge múmkindik beredi.
Qazirgi tańda Astana órkendegen Qazaqstannyń sımvolyna, iri mádenı, ekonomıkalyq, rýhanı ortalyqqa aınalǵan. Sondyqtan da jas astanamyzdyń alǵashqy qadamdaryn eske túsirip, el bolashaǵynyń besigi - Astana tarıhyna qaıta úńilýdiń mańyzy erekshe, dep habarlaıdy QR Tuńǵysh Prezıdenti mýzeıiniń baspasóz qyzmeti.
