El bolashaǵy bilimdi urpaq qolynda - Bilim jáne ǵylym vıtse-mınıstri
KÓKShETAÝ. QazAqparat - Elbasy Joldaýynyń negizgi qaǵıdalaryn túsindirý maqsatynda Aqmola oblysyna jumys saparymen kelgen QR Bilim jáne ǵylym vıtse-mınıstri Bıbigúl Asylova Tselınograd aýdanynda boldy, dep habarlaıdy «QazAqparat» HAA tilshisi.
Qosshy selolyq okrýgindegi №2 orta mektepte ótken jıynda sóz sóılegen Bıbigúl Amangeldiqyzy Elbasynyń Joldaýynda aıtylǵan bes basym baǵyttyń árqaısysyna jeke-jeke toqtalyp, jan-jaqty túsindirdi. Sondaı-aq, ústimizdegi jyldan bastap bilim salasyna engizilgen birqatar ózgeristerge de toqtalyp ótti.
«Mańyzdy qujat áleýmettik saıasatqa, halyqtyń ál-aýqatyn, adamı kapıtaldyń sapasyn arttyrýǵa negizdelgeni belgili.Sol sebepti de mektepke deıingi bilim berý jáne oqytýmen qamtamasyz etý, bilim sapasyn arttyrý, mamandardy qaıta daıarlaý sııaqty mańyzdy máselelerge basty nazar aýdaryp otyrmyz. Kezeń-kezeńmen úsh tilde bilim berýge kóshý, tegin kásiptik-tehnıkalyq bilim júıesi jobasyn iske asyrý, mindetti áleýmettik medıtsınalyq saqtandyrýdy engizý el Prezıdenti Nursultan Nazarbaevtyń Úkimet pen Parlamenttiń aldyna qoıǵan basty tapsyrmalary bolyp tabylady. Eljandy urpaq tárbıelep qana qoımaı oqýshylardy jan-jaqty damyǵan, zamanaýı tehnologııalardy meńgergen, bilimdi azamat retinde qalyptastyrý basty maqsatymyz bolýy kerek. Sebebi, el bolashaǵy bilimdi urpaq qolynda»,- dedi vıtse-mınıstr.
Sonymen qatar, kezdesý barysynda ujym qyzmetkerleri kókeıde júrgen kóptegen túıitkildi máselelerdi ortaǵa salyp, san saýaldarǵa tuşymdy jaýap ala aldy.
Budan keıin vıtse-mınıstr Bıbigúl Asylovany bilim mekemesiniń tynys-tirshiligimen oblystyq bilim basqarmasynyń basshysy Balym Іzbasarova jaqynyraq tanystyryp shyqty. Osyndaı kezdesýler aýdan ortalyǵyndaǵy «Interget Solution», «Sky Express Elevator Kz», sonymen qatar, «KAZYNA SR» jaýapkershiligi shekteýli seriktestikterinde ótti.
