El bolashaǵy úshin tańdaý: Óńir turǵyndarynyń kóńil-kúıi qandaı
ASTANA. KAZINFORM – 15 naýryz kúni elimizde jańa Konstıtýtsııa jobasy boıynsha referendým ótip jatyr. Kazinform agenttiginiń tilshisi óńirlerdi aralap, daýys berýge kelgen jurtshylyqtyń pikirin bilgen edi. Turǵyndardyń deni bul kúndi memleket damýynyń jańa belesi dep sanaıdy.
Túrkistan qalasyndaǵy №935 ýchaskege kelgen turǵyndardyń biri bul naýqannyń mańyzdylyǵyna toqtaldy. Ol óz tańdaýyn jasaý arqyly el erteńine beıjaı qaramaıtynyn jetkizdi.
– Tańerteń kóterińki kóńil-kúımen kelip, daýys berdim. Bul referendým elimizdiń damýy úshin qajet, - deıdi qala turǵyny.
Aqmola oblysynyń jastary da saıası naýqannan qalys qalyp jatqan joq. Olardyń paıymynsha, árbir daýys – el bolashaǵyna qosylǵan úles.
– Tańdaý jasaý arqyly úlken istiń bir bólshegi bolǵym keledi. Osylaısha Qazaqstannyń erteńine úles qosa alamyn dep oılaımyn, - dedi jas saılaýshy.
Jetisý oblysynda da belsendili azamattardyń qarasy qalyń. Taldyqorǵandyq turǵyn mundaı mańyzdy sátterde azamattyq ustanymyn bildirýdi ádetke aınaldyrǵanyn aıtady.
– Búgin otbasymyzben kelip, tańdaýymyzdy jasadyq. Mundaı sharalarǵa árdaıym belsene qatysamyz, - deıdi ol.
Al Petropavl turǵyny referendýmǵa qatysýdy árbir otandasymyzdyń perzenttik paryzy dep biledi. Onyń aıtýynsha, dál osyndaı sátterde memlekettiń taǵdyry sheshiledi.
– Ýchaskede adam kóp. Jurttyń otbasymen, ásirese úlken kisilerdiń kóptep kelýi – halyqtyń el bolashaǵyna degen jaýapkershiligin kórsetedi, - dep atap ótti ol.
Eldiń ár qıyrynan jetken pikirler qazaqstandyqtar úshin referendýmnyń máni bólek ekenin ańǵartty. Daýys berý jaqsy bir otbasylyq dástúrge aınalǵandaı. Adamdar jaqyndarymen birge kelip, oqıǵanyń mańyzdylyǵyn talqylap, keıingi urpaqqa úlgi bolyp otyr.
Aıta keteıik, respýblıka boıynsha ýchaskeler tańǵy saǵat 07:00-den bastap jumys istep tur.
Saǵat 18:00-degi málimet boıynsha, saılaýshylardyń kelý kórsetkishi 70 paıyzdan asty.
