«El birligi» doktrınasynyń jobasynda ulttyq ıdeıanyń Qazaqstan halqyn toptastyrýdaǵy róli aıtylmaıdy - Fılosofııa jáne saıasattaný ınstıtýtynyń dırektory
ALMATY. Jeltoqsannyń 2-si. QazAqparat /Erlik Erjanuly/ - «El birligi» doktrınasy burynǵy keńestik respýblıkalardyń arasynda eń birinshi bop Qazaqstanda qolǵa alynyp otyr. Bul búgin Almatyda jobany pysyqtaýmen aınalysatyn jumys komıssııasynyń birinshi otyrysynda aıtyldy,
dep habarlaıdy QazAqparat.
«Sessııada qaralǵan bul joba áli de kóp talqylaýdy qajet etedi. Biz ózimizdiń ınstıtýtymyzda da, basqa jerlerde de talqylap júrmiz. Doktrına 2020 jylǵa deıin, ıaǵnı onjyldyqqa qabyldanbaq. Ol burynǵy keńestik elderde birinshi ret bizde der kezinde qabyldanaıyn dep otyr. Kelesi jyldan bastap Qazaqstanda úlken ózgerister bolyp, álemdegi orny ózgereıin dep jatyr. Bizdiń jan-jaǵymyzda óte turaqsyz jaǵdaılar bar. Olar áser etpeı qoımaıdy. Sondyqtan el birligi, ulttyq birlik aýadaı qajet», deıdi bilim jáne ǵylym mınıstrliginiń Fılosofııa jáne saıasattaný ınstıtýtynyń dırektory Ábdimálik Nysanbaev. QR UǴA Akademıginiń de jobaǵa qatysty óz usynystary bar. Birinshi, alǵashqy bólimde halyqqa onsha túsiniksiz doktrına sııaqty sózderge termınologııalyq túsinikter berý týraly. Sebebi, osy uǵymdardyń túsiniksizdiginen úlken daý-janjal bolýy múmkin. Ekinshi, onda qazaq ulty aıtylmaıdy. Qazaq halqy degen bar. Qazir qazaqtardyń úlesi Qazaqstanda 65 paıyzdan asty. Qazaq halqynyń toptastyrýshylyq rólin kórsetip, qazaq ultyn da kórsetý kerek. Úshinshisi, el birligin túsindirýge qatysty. «Qazir shyn máninde búkil álemde azamattyq biregeılik pen ulttyq biregeılený qatar júrip jatyr. Áleýmettik zertteýlerge qaraǵanda azamattyq biregeılený basymyraq. Osy ekeýin bir-birine qarama-qaıshy qoımaı, qazaqstandyqtardyń biregeılenýin, qazaqtardyń biregeılenýin bir-birimen baılanystyrǵan jón. Bul eki úderis búgingi tańda ózinshe júrip jatyr. 13-shi qarashada halyqpen tikeleı efır arqyly suhbattasqan Prezıdent «meni mazalap júrgen úlken másele bar. Ol - ulttyq ıdeıa» dep, bul máselege qatysty óz pikirin aıtyp, onyń tórt tuǵyryn atady. Sonyń bireýi - ulttyq birlik. Ókinishke qaraı, bizdiń jobamyzda ulttyq ıdeıanyń Qazaqstan halqyn toptastyrýdaǵy róli aıtylmaıdy. Ony «El birligi» doktrınasynda ashyp kórsetý qajet», deıdi fılosofııa ǵylymynyń doktory, professor Ábdimálik Nysanbaıuly.
