El birligi Doktrınasy jobasyn talqylaýǵa barsha qoǵamdy jumyldyrý basym mindetterdiń biri - M. Qul-Muhammed
ASTANA. Qarashanyń 18-i. QazAqparat /Qanat Mámetqazyuly/ - El birligi Doktrınasy jobasyn talqylaýǵa barsha qoǵamdy jumyldyrý basym mindetterdiń biri. Búgin Mádenıet jáne aqparat mınıstri Muhtar Qul-Muhammed vedomstvanyń alqa májilisi barysynda osylaı málim etti,
dep habarlaıdy QazAqparat.
«Mınıstrlik jumysynyń basty baǵyty bolyp qala beretin másele - jaqynda ǵana Elbasynyń tapsyrmasy boıynsha ázirlenip, jarııalanǵan Qazaqstannyń el birligi Doktrınasy jobasy. Atalǵan Doktrına jobasy qoǵamda qyzý talqylaný ústinde. Sondyqtan da, aqparat salasy qyzmetkerleriniń basty nazary osy máselede turýy kerek», dedi M. Qul-Muhammed. Mınıstrdiń aıtýynsha, Memleket basshysymen tikeleı jeli suhbatyna joldanǵan saýaldardyń birshama bóliginde qazaqstandyqtar ishki saıasatqa qatysty másele kótergen. Sondyqtan da, mınıstr ishki saıasat salasynda atalǵan Doktrına jobasyn talqylaýǵa qoǵamnyń meılinshe atsalysýyn qamtamasyz etýdi basym baǵyttardyń qataryna jatqyzyp otyr. «Elbasy aıtyp ótkenindeı, bul jumysqa barlyq azamattyq sektordyń zııatkerlik resýrsy, mádenı jáne medıa-qaýymdastyǵy atsalýy tıis», dedi M. Qul-Muhammed.
