"El birligi" doktrınasy turaqtylyqty saqtaýǵa múmkindik beredi -Strategııalyq zertteýler ınstıtýtynyń dırektory
ALMATY. Jeltoqsannyń 2-si. QazAqparat /Erlik Erjanuly/ - Sarapshylar turaqsyzdyq oshaǵynyń qataryna qosatyn Shynjań damyp kele jatqan Qytaı memleketiniń eń osal tusy. Bul búgin Almatyda "El birligi" doktrınasy jobasyn pysyqtaýmen aınalysatyn jumys komıssııasynyń birinshi otyrysynda aıtyldy,
dep habarlaıdy QazAqparat.
«Shynjań-Uıǵyr avtonomııalyq ólkesindegi jaǵdaı týraly aıtqanda Qazaqstan qazir batysqa shyǵatyn qytaı taýarlarynyń basty tranzıttik baǵyty bolyp otyr. Qytaıdy munaı ónimderimen 90 paıyz qamtamasyz etetin buǵazdy qazir bir derjavanyń áskerı-teńiz kúshteri baqylaýda. Sondyqtan bul Eýropaǵa shyǵatyn qurǵaqtaǵy jol bolyp otyr. Olar Qazaqstannyń qýat tasymaldaýshylaryna da qyzyǵýshylyq tanytýda. Teńizge shyǵatyn joly joq Qazaqstan úshin bul Eýropa men Ońtústik Shyǵys Azııa elderiniń naryǵyna shyǵý úshin taptyrmas múmkindik. Alaıda Qytaı AQSh-tyń basty básekelesi. AQSh Shynjańdy geostrategııalyq nysan retinde qarastyrady. Ol damyp kele jatqan Qytaı eliniń eń osal tusy», deıdi QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Bolat Sultanov. Saıasattanýshy ǵalymnyń paıymdaýynsha, Qytaı basqa jaqtan alyp qarastyrǵanda Qazaqstanmen ekonomıkalyq baılanystaryna jáne onyń energııalyq resýrstaryna táýeldi. Sol sebepti Qazaqstan da Shynjańdaǵy jaǵdaıǵa alańdaýshylyq tanytyp otyr. Onda 1990-98 jyldary uıǵyr azatshylarynyń jáne Shyǵys Túrkistandy qurýǵa múddeli ózge de taraptardyń qatysýymen keminde 700 qarýly qaqtyǵys boldy. Qazir buǵan lańkestik toptar da enýge tyrysýda. Sondyqtan Tájikstanda jáne Qyrǵyzstannyń Ferǵana óńirinde turaqsyzdyq bolyp turǵan kezde "El birligi" doktrınasy bizge eldegi turaqtylyqty saqtaýǵa jańa múmkindikter beredi.
