El azamattyǵy týraly zańnamany buzǵan 600-den astam adam jazalandy

ASTANA. KAZINFORM – Osy jylǵy 10 aıda 18 myńnan astam adam azamattaǵyn aýystyrdy. Bul týraly QR Іshki ister mınıstrliginiń baspasóz qyzmeti málim etti. 

- Qoldanystaǵy zańnamaǵa sáıkes belgili bir adamǵa qatysty qos azamattyq faktisi anyqtalǵan jaǵdaıda, Qazaqstan Respýblıkasy Ákimshilik quqyqbuzýshylyq kodeksiniń 496-baby boıynsha ákimshilik jaýapkershilik qarastyrylǵan. Osy jyldyń 10 aıynda basqa memlekettiń azamattyǵyn qabyldaýyna baılanysty 18 myńnan astam adam Qazaqstan Respýblıkasynyń azamattyǵynan shyǵaryldy, onyń ishinde 600-den asa adam atalǵan bap boıynsha ákimshilik jaýapkershilikke tartyldy. Byltyrǵy osy kezeńde 16 myńnan astam adam azamattyqtan shyǵarylyp, onyń ishinde 500-den asa adam ákimshilik jaýapkershilikke tartyldy, - delingen  vedomstvonyń Kazinform agenttigine bergen jaýabynda.

Elimizge keletin sheteldikterge turaqty negizde monıtorıng júrgiziledi. Shetel azamattarynyń elde bolýyn baqylaý QR Ulttyq qaýipsizdik komıteti Shekara qyzmetiniń derekter bazasymen biriktirilgen ІІM aqparattyq júıeleri arqyly júzege asyrylady.

Atap aıtqanda, Ákimshilik quqyqbuzýshylyq kodeksiniń 496-baby boıynsha Qazaqstan Respýblıkasynyń azamattyǵynan aıyrylǵan adamnyń Qazaqstan azamatynyń pasportyn nemese jeke kýáligin paıdalanýy jeke tulǵalarǵa 200 AEK mólsherinde aıyppul salýǵa ákep soǵady.

Sonymen qatar shetel azamattyǵyn alý faktisin habarlamaý nemese Qazaqstan Respýblıkasynyń zańnamasynda belgilengen merzimnen asyp ketken ýaqytta habarlaý – 100 AEK mólsherinde aıyppul salýǵa nemese Qazaqstan Respýblıkasynyń sheginen ákimshilik jolmen shyǵaryp jiberýge alyp keledi.

Zańnamaǵa sáıkes, Qazaqstan Respýblıkasynyń azamattyǵy eki jaǵdaıda toqtatylady: óz erkimen shyqqanda jáne azamattyqtan aıyrǵanda.

Qazaqstan Respýblıkasynyń azamattyǵyn joǵaltqan adamdar týraly málimetti ishki ister organdary on jumys kúni ishinde Halyqty qujattandyrýdyń derekter bazasyna engizedi.

Eske salsaq, bıyl qyrkúıek aıynda QR Іshki ister mınıstrligi qos azamattyq úshin jazany qatańdatýǵa qatysty túsinik bergen edi. Bul turǵyda QR Іshki ister mınıstriniń orynbasary Igor Lepeha qos azamattyq úshin jaýapkershilikti kúsheıtýge vedomstvo qarsy emes ekenin aıtty.

Aıta keteıik, byltyr Qazaqstan azamattyǵyn 20,2 myń adam aldy. Qazaqstan Respýblıkasynyń azamattyǵyna qabyldanǵan adamdardyń eń kóp sany: Ózbekstan, QHR, Reseı, Túrikmenstan jáne Qyrǵyzstanǵa tıesili.