El azamattarynyń shetelde quqyqtaryn tıimdi qorǵaıtyn qujat qabyldandy
ASTANA. QazAqparat - Parlament Senatynyń jalpy otyrysynda palata depýtattary «Halyqaralyq jeke quqyq jónindegi Gaaga konferentsııasynyń Jarǵysyn ratıfıkatsııalaý týraly» zań jobasyn qabyldady, dep habarlaıdy QazAqparat.
«Qazaqstan azamattarynyń shetelde jeke otbasylyq jáne iskerlik múddelerin quqyqtyq qorǵaýdy jetildirý boıynsha Elbasynyń tapsyrmasyn iske asyrý aıasynda Halyqaralyq jeke quqyq jónindegi Gaaga konferentsııasynyń jumysyna qatysý usynylyp otyr. Uıymǵa múshelik Gaaga konferentsııasynyń Jarǵysyn ratıfıkatsııalaý arqyly júzege asyrylady. Búginde bul uıymǵa 81 memleket jáne Eýropalyq odaq kiredi. Atalǵan halyqaralyq uıymnyń maqsaty - halyqaralyq jeke quqyq normalaryn birizdendirý, osy saladaǵy memleketterdiń yntymaqtastyǵyna járdem kórsetý»,-dedi QR Ádilet mınıstri Marat Beketaev zań jobasy boıynsha baıandamasynda.
Onyń sózine qaraǵanda, Gaaga konferentsııasynyń aıasynda 39 konventsııa jasalǵan. Olar azamattyq is júrgizý aıasynda quqyqtyq kómek kórsetýge baǵyttalǵan. Qazaqstannyń Gaaga konferentsııasyndaǵy halyqaralyq zań shyǵarýshylyq jumysyna tikeleı qatysýy shetelde bizdiń azamattardyń quqyqtarynyń neǵurlym tıimdi qorǵalýyn qamtamasyz etedi.
«Uıymnyń negizgi organdary - Jalpy ister jáne saıasat boıynsha keńes pen Dıplomatııalyq ókilder keńesi. Bul organdar óz sheshimderin konsensýs negizinde qabyldaıdy, ıaǵnı barlyq qatysýshy memleketter ustanymyn esepke alýǵa múmkindik beriledi»,-deıdi mınıstr.
Aıta keteıik, bul baǵyttaǵy qadamdar bizdiń memleket úshin jańa halyqaralyq sharttardy jasasýǵa, uıymnyń basqa músheleriniń jeke azamattyq quqyq salasynda yntymaqtastyqty damytýǵa, halyqaralyq deńgeıde óz múddelerin qorǵaýǵa múmkindik beredi.
Sóz sońynda ol Gaaga konferentsııasynyń Jarǵysynda Qazaqstan Konstıtýtsııasyna qaıshy keletin normalar joq ekenin, uıymǵa qosylý jyl saıynǵy múshelik jarnany (6850 eýro) tóleýdi kózdeıtinin atap ótti. Bul shyǵystar QR Syrtqy ister mınıstrliginiń tıisti bıýdjettik baǵdarlamasynda kózdelgen.
