El azamattarynyń 94 paıyzy emdeý mekemelerin ózderiniń turǵylyqty jeri boıynsha tańdady

Bul týraly búgin Astanada atalǵan júıeni engizý barysy jaıynda ótken brıfıngte QR Densaýlyq saqtaý mınıstrligi Medıtsınalyq qyzmetterge aqy tóleý komıtetiniń tóraǵasy Qanat Ermekbaev aıtty.

«9 aıdyń nátıjesi boıynsha el azamattarynyń 94 paıyzy emdeý mekemelerin ózderiniń turǵylyqty jeri boıynsha tańdady. Al qalǵan 6 paıyzǵa jýyǵy kórshiles oblystardan em qabyldaǵan»,- dedi ol.

Onyń sózine qaraǵanda, keıbir eldi mekender basqa oblystardyń aýmaǵyna jaqyn ornalasqan. Sondyqtan olar emdeý mekemelerin basqa oblystardyń aýmaǵynan tańdap otyr. Sonymen qatar elimizdiń keıbir azamattary respýblıkalyq klınıkalarda emdelýge nıet bildirgen. Q. Ermekbaevtyń aıtýynsha, Qazaqstan azamattarynyń medıtsınalyq mekemeni erkin tańdaý quqyǵyn iske asyrý turǵysynda elimizde shildeniń 1-inen bastap Josparly emdeýge jatqyzý portaly jumys isteıdi. Qazirgi kezde josparly emdeýge jatqyzý bıýrosyna 396 myńnan astam joldama tirkelgen, onyń 35,1 paıyzy aýyl turǵyndary bolyp tabylady.

Aıta keteıik, bıylǵy jyly Biryńǵaı ulttyq densaýlyq saqtaý júıesin engizý aıasynda Densaýlyq saqtaý mınıstrligi azamattardyń dáriger men medıtsınalyq uıymdy erkin tańdaýyn iske asyrýda. Bul medıtsınalyq uıymdardyń arasynda básekelestik ortany qurýǵa, medıtsınalyq mekemelerdiń sapaly jáne qoljetimdi kómek kórsetý qaýqaryn arttyrýǵa jáne basqa da basymdyqtardy iske asyrýǵa negizdelgen.

Atalǵan komıtet tóraǵasynyń paıymdaýynsha, Biryńǵaı ulttyq densaýlyq saqtaý júıesin iske asyrý belgilengen parametrler aıasynda júrip jatyr. Atap aıtqanda, bul júıe boıynsha jurtshylyq tarapynan aryzdar men shaǵymdar túspegen. 9 aıdyń qorytyndysy men 4-shi toqsanda bul baǵyt boıynsha turaqty jumystar atqarylýda.