El azamattarynyń 23,6 paıyzy qyz alyp qashýdy qalypty jaǵdaı dep sanaıdy - saýalnama

ASTANA. QazAqparat – 2022 jyldan bastap zorlyq-zombylyq jaǵdaıynda agressordyń kinásin dáleldeý mindeti jábirlenýshige emes, polıtsııaǵa júkteldi. Osylaısha sońǵy eki jylda áıelderdi zorlyq-zombylyqtan qorǵaý boıynsha ІІM qyzmetkerleri sany eki ese artty, dep habarlaıdy QazAqparat tilshisi.

Bul derekti Qazaqstandyq qoǵamdyq damý ınstıtýtynyń otbasy ınstıtýtyn zertteý ortalyǵynyń basshysy Olga Nıkolaeva aıtty.

«El azamattarynyń 5%-dan astamy zorlyq-zombylyqqa ushyraǵan, onyń ishinde erler de, áıelder de bar. Er adamdar bul qaýipke negizinen kóshede, al áıelder qoǵamdyq oryndarda jáne úıde tap bolǵan, bul da turmystyq zorlyq-zombylyq máselesiniń ózektiligin kórsetedi. Osy rette qazaqstandyqtardyń úshten biri sońǵy eki jylda bul másele boıynsha jaǵdaıdyń jaqsarǵanyn atap ótken. Buǵan memlekettik organdardyń jumysy da óz áserin tıgizdi», - dedi spıker Ortalyq kommýnıkatsııalar qyzmetinde Qazaqstandaǵy genderlik saıasattyń erekshelikterine arnalǵan brıfıngte.

Qazaqstandyq qoǵamda turmystyq zorlyq-zombylyqty, qýdalaýdy, jynystyq qýdalaýdy, áıelder men qyzdardy nekege turý maqsatynda urlaýdy qalypty emes jaǵdaıǵa aınaldyrý úshin osyndaı quqyq buzýshylyqtarǵa nemquraılyq tanytpaý, zańnamaǵa «jynystyq qýdalaý» termınin engizý usynylyp otyr.

Respondentterdiń tórtten bir bóligi (23,6%) áıelderdi eriksiz alyp qashý qubylysyn beıtarap nemese oń dep baǵalaǵan.

Saýalnamaǵa qatysqan qazaqstandyqtardyń jartysy ǵana (54%) qyzdy kelisiminsiz alyp qashqan jaǵdaıda qyzdyń úıden ketip, quqyq qorǵaý organdaryna málimdeýi keregin aıtqan.

Respondentterdiń 11,7% qyzdy sol úıde qalyp, alyp qashqan er adammen otaý quraýy kerek dep sanaıdy.

Qazaqstandyqtardyń 18,4% qyzdyń ketip, quqyq qorǵaý organdaryna habarlamaýy keregin aıtyp otyr.

«Harrasment, ıaǵnı seksýaldy qýdalaý problemasy da bar. Azamattardyń shamamen 5% jynystyq qýdalaýǵa ushyraǵan. Mundaı jaǵdaı erlerge qaraǵanda áıelder arasynda 10 ese jıi bolatynyn aıta ketken jón», - dedi O.Nıkolaeva.

Buǵan deıin Qazaqstandyq qoǵamdyq damý ınstıtýty basqarma tóraǵasynyń orynbasary Ásem Qaıdarova elimizde áli de genderlik alshaqtyq bar ekenin aıtqan edi.

Sondaı-aq, Qazaqstan áıelderiniń 47 paıyzy bıznespen aınalysqysy keledi.