El azamattarynyń Ońtústik Koreıadan erikti túrde shyǵý baǵdarlamasy qashanǵa deıin jalǵasady
ASTANA. KAZINFORM – Koreıa Respýblıkasynda zańsyz jumys istep júrgen Qazaqstan azamattary elden aıyppul tólemeı jáne qaıta kirýge tyıym salynbaı erikti túrde shyǵa alady. Bul múmkindikti azamattar 2026 jyldyń aqpan aıynyń sońyna deıin qoldanýyna bolady. Baǵdarlama 2025 jyldyń jeltoqsan aıynan bastap iske qosylǵan.
QR Eńbek jáne halyqty áleýmettik qorǵaý mınıstrligi zańsyz kóshi-qondy azaıtý jáne azamattarymyzdyń quqyqtaryn qorǵaý máseleleri boıynsha Koreıa Respýblıkasynyń Ádilet mınıstrligimen júrgizgen kelissózder barysynda erikti shyǵý baǵdarlamasynyń ýaqytyn uzartýǵa kelisti.
Atalǵan sharalar quqyqtyq saldardy jeńildetýge jáne óz mártebesin retteýge daıyn azamattardy qoldaýǵa baǵyttalǵan. Baǵdarlama májbúrli túrde deportatsııalaýǵa jatatyn qylmystyq quqyq buzýshylyq jasaǵan tulǵalarǵa, sondaı-aq 2025 jyldyń 1 jeltoqsanynan keıin zańsyz mártebege ıe bolǵan sheteldikterge qoldanylmaıdy.
Baǵdarlamaǵa qatysý úshin pasport, erikti shyǵý týraly ótinish jáne áýe bıleti qajet. Aldyn ala habarlandyrý ushý kúnine 15-ten 3 kún qalǵanǵa deıingi aralyqta Koreıa Respýblıkasynyń kóshi-qon qyzmetteri arqyly berilýi tıis.
QR Eńbek jáne halyqty áleýmettik qorǵaý mınıstrligi Qazaqstan azamattaryna zańsyz mıgratsııa, elden shyǵarylý, aıyppuldar, quqyqtardyń shektelýi jáne eńbek daǵdarystarynyń aldyn alý úshin shetelde tek zańdy negizde eńbek etýge keńes beredi.
Tek resmı jáne tekserilgen eńbek etý arnalary – lıtsenzııalanǵan jumyspen qamtıtyn jekeshe agenttikter, memlekettik baǵdarlamalar jáne jumys berýshilerdiń resmı usynystaryn paıdalaný qajet.
EHÁQM shetelde eńbek etetin Qazaqstan azamattarynyń quqyqtaryn qorǵaý boıynsha júıeli jumystardy jalǵastyra beredi.
Buǵan deıin Koreıadaǵy zańdy jumys aıasyndaǵy tıisti kelisimge qashan qol qoıylatynyn, ıaǵnı Employment Permit System (EPS) júıesin iske asyrý qaı merzimge belgilenin jazǵan edik.